व्यापारी महासंघाने घेतली गंभीर दखल ; आर्थिक लुबाडणुकीचा प्रयत्न असल्याची व्यक्त केली शक्यता
मालवण | प्रतिनिधी : मालवण शहरातील एका हॉटेल व्यवसायिकाला “हॉटेलमध्ये गाणी लावल्याबद्दल ५० लाख रुपये नुकसान भरपाई द्या”, अशी कायदेशीर नोटीस आली आहे. दरम्यान, हा प्रकार फसवणुकीचा असून व्यापाऱ्यांनी अशा नोटिसींना बळी पडू नये, असे आवाहन जिल्हा व्यापारी महासंघाचे कार्यवाह नितीन वाळके यांनी केले आहे.
संबंधित हॉटेल व्यवसायिकाला काही दिवसांपूर्वी एक पत्र मिळाले होते. त्यामध्ये “तुमच्या हॉटेलमध्ये वाजवली जाणारी गाणी ही ‘फोनोग्राफीक परफॉर्मन्स लिमिटेड’, अंधेरी-मुंबई या संस्थेच्या मालकीची आहेत. तुम्ही परवानगी न घेता ही गाणी वाजवून कॉपीराईट नियमांचे उल्लंघन केले आहे,” असा दावा करण्यात आला आहे.
काही दिवसांनंतर एका महिला वकिलाच्या नावाने थेट नोटीस पाठवून ५० लाख रुपयांच्या भरपाईची मागणी करण्यात आली. या अचानक आलेल्या मोठ्या रकमेच्या मागणीमुळे संबंधित व्यवसायिक भयभीत झाला आहे.
या प्रकरणाची माहिती मिळताच जिल्हा व्यापारी महासंघाने याची गंभीर दखल घेतली आहे. नितीन वाळके यांनी पत्रकारांशी बोलताना यातील धोके स्पष्ट केले. या नोटिसीला कोणताही ठोस कायदेशीर आधार नसून हा केवळ आर्थिक लुबाडणुकीचा प्रयत्न आहे. अशा नोटिसींना उत्तर दिल्यास किंवा त्यातील लिंक्सवर क्लिक केल्यास मोबाईल हॅक होणे किंवा बँक खात्यातून पैसे चोरीला जाण्याचे प्रकार घडू शकतात. व्यापाऱ्यांनी अशा नोटिसींना उत्तर देऊ नये आणि घाबरून न जाता महासंघाशी संपर्क साधावा असे म्हटले आहे.
हा प्रकार पूर्णपणे फसवणुकीचा आणि व्यापाऱ्यांमध्ये दहशत निर्माण करून पैसे उकळण्याचा आहे. कोणत्याही व्यापाऱ्याला अशा प्रकारची नोटीस आल्यास त्यांनी तातडीने व्यापारी महासंघाशी संपर्क साधावा असे आवाहन श्री. वाळके यांनी केले आहे.
जर आपल्याकडेही अशी कोणतीही संशयास्पद नोटीस आली असेल तर त्यावर कोणताही व्यवहार करण्यापूर्वी कायदेशीर सल्ला घ्यावा किंवा व्यापारी संघटनेला कळवावे असेही श्री. वाळके यांनी म्हटले आहे.
