27 जानेवारी ते 20 फेब्रुवारीदरम्यान नाशिक, अहिल्यानगर व पुणे जिल्ह्यात आयोजन
3,500 विद्यार्थ्यांचा सहभाग, उद्योजकतेवर भर
सावित्रीबाई फुले पुणे विद्यापीठाच्या सेंटर ऑफ इनोव्हेशन, इनक्युबेशन अँड एंटरप्राइझ (SPPU-CIIE) तर्फे विद्यार्थ्यांमध्ये उद्योजकतेची मानसिकता विकसित करण्यासाठी दोन दिवसीय स्टार्टअप बूट कॅम्पचे आयोजन करण्यात आले आहे.
पुणे : सावित्रीबाई फुले पुणे विद्यापीठाच्या (SPPU) सेंटर ऑफ इनोव्हेशन, इनक्युबेशन अँड एंटरप्राइझच्या वतीने 27 जानेवारी ते 20 फेब्रुवारी या कालावधीत नाशिक, अहिल्यानगर आणि पुणे जिल्ह्यातील 20 ठिकाणी विद्यार्थ्यांसाठी दोन दिवसीय स्टार्टअप बूट कॅम्प आयोजित करण्यात आले आहेत.
SPPU-CIIE चे संचालक देविदास गोल्हार यांनी सांगितले की, “आमचा उद्देश विद्यार्थ्यांनी केवळ नोकरीकडे पाहू नये, तर उद्योजकतेलाही करिअरचा पर्याय म्हणून स्वीकारावे हा आहे. पहिल्या टप्प्यात आम्ही उद्योजकीय संधींबाबत जनजागृतीसाठी व्याख्याने घेतली होती. हा बूट कॅम्प म्हणजे दुसरा महत्त्वाचा टप्पा आहे.”
या उपक्रमासाठी सुमारे 3,500 विद्यार्थ्यांनी नोंदणी केली असून, त्यांना लहान गटांमध्ये विभागण्यात आले आहे. बूट कॅम्पमध्ये विद्यार्थ्यांना समस्या ओळखणे, डिझाइन थिंकिंग, कल्पनांचे प्रमाणीकरण, व्यवसाय मॉडेल विकास, पिचिंग कौशल्य अशा विविध बाबींचे प्रत्यक्ष प्रशिक्षण दिले जाणार आहे.
गोल्हार पुढे म्हणाले की, बूट कॅम्पमधून निवडलेल्या नाविन्यपूर्ण कल्पना मार्च महिन्यात होणाऱ्या एसपीपीयू स्टार्टअप ऑलिम्पियाडमध्ये सादर केल्या जातील. “या ऑलिम्पियाडमध्ये विद्यार्थ्यांना प्रायोजक, सरकारी अधिकारी, गुंतवणूकदार यांच्यासमोर आपल्या कल्पना मांडण्याची संधी मिळणार आहे,” असेही त्यांनी स्पष्ट केले.
या उपक्रमामुळे विद्यार्थ्यांना केवळ व्यावसायिक कौशल्येच नव्हे तर स्वतःचा स्टार्टअप सुरू करण्याचा आत्मविश्वास मिळेल, अशी अपेक्षा विद्यापीठ प्रशासनाने व्यक्त केली आहे.
