हिंदू संघटनेच्या चौकशीनंतर घबराटीचा टोकाचा निर्णय
शाहजहानपूरमध्ये खळबळ, पोलिसांकडून तपास सुरू
शाहजहानपूर जिल्ह्यातील एका पिझ्झा कॅफेमध्ये घडलेल्या घटनेने मोठी खळबळ उडाली आहे. एका हिंदू संघटनेच्या सदस्यांनी चौकशी केल्यानंतर घाबरून एका तरुण आणि तरुणीने दुसऱ्या मजल्यावरून उडी मारल्याची घटना समोर आली आहे. या घटनेत दोघेही गंभीर जखमी झाले असून त्यांच्यावर खासगी रुग्णालयात उपचार सुरू आहेत. घटनेची माहिती मिळताच पोलीस घटनास्थळी दाखल झाले. सध्या संपूर्ण प्रकरणाचा तपास सुरू असून अद्याप कोणतीही अधिकृत तक्रार दाखल झालेली नाही.
शाहजहानपूर : शनिवारी संध्याकाळी शाहजहानपूर जिल्ह्यातील एका पिझ्झा कॅफेमध्ये घडलेल्या धक्कादायक घटनेत एका तरुणाने आणि एका तरुणीने दुसऱ्या मजल्यावरून उडी मारली. एका हिंदू संघटनेच्या सदस्यांनी चौकशी केल्याचा आरोप झाल्यानंतर घाबरून हा टोकाचा निर्णय घेतल्याचे पोलीस सूत्रांनी प्रहार डिजिटलला सांगितले.
सूत्रांच्या माहितीनुसार, या घटनेत २१ वर्षीय तरुण आणि १९ वर्षीय तरुणी गंभीर जखमी झाले असून, त्यांना तातडीने खासगी रुग्णालयात दाखल करण्यात आले आहे. सध्या दोघांवर उपचार सुरू असून त्यांची प्रकृती स्थिर असल्याचे सांगण्यात येत आहे.
ही घटना कांत पोलीस ठाण्याच्या हद्दीतील बरेली मोरजवळील एका इमारतीत घडली. या इमारतीच्या दुसऱ्या मजल्यावर पिझ्झा कॅफे आहे. शनिवारी संध्याकाळी काही हिंदू संघटनेचे सदस्य कॅफेमध्ये आले आणि एकत्र बसलेल्या तरुण-तरुणीची चौकशी सुरू केली, असे पोलिस सूत्रांनी सांगितले.
या दोघांनी पोलिसांना दिलेल्या माहितीनुसार, त्यांनी झटपट नूडल्सची ऑर्डर दिली होती आणि जेवणाची वाट पाहत बसले होते. यावेळी काही जणांनी त्यांना जातीबाबत प्रश्न विचारले. त्यावर दोघांनीही आपण हिंदू असल्याचे सांगितले. मात्र, त्यानंतर काही लोकांनी त्यांचे मोबाईलवर चित्रीकरण करण्यास सुरुवात केल्याचा आरोप त्यांनी केला आहे.
या परिस्थितीमुळे घाबरलेल्या तरुणाने अचानक खिडकीची पट्टी ओढून दुसऱ्या मजल्यावरून उडी मारली. काही क्षणांतच त्याच्यासोबत बसलेल्या तरुणीनेही उडी मारल्याचे पोलिस सूत्रांनी सांगितले.
पोलीस अधीक्षक राजेश द्विवेदी यांनी सांगितले की, माहिती मिळताच पोलीस तत्काळ घटनास्थळी पोहोचले. संपूर्ण घटनेचा तपास सुरू असून, आतापर्यंत कोणतीही अधिकृत तक्रार दाखल झालेली नाही. तक्रार प्राप्त होताच दोषींवर कडक कारवाई करण्यात येईल, असेही त्यांनी स्पष्ट केले.
