राज्य भूमी अभिलेख कार्यालयासमोरील मोकळ्या मैदानातील घटना
वाळलेल्या गवतामुळे आग वेगाने पसरल्याची शक्यता
येरवडा परिसरातील राज्य भूमी अभिलेख कार्यालयासमोरील मोकळ्या मैदानात सोमवारी दुपारी भीषण आग लागून २० हून अधिक कार आणि सुमारे ५० दुचाकी जळून खाक झाल्या. या घटनेत कोणतीही जीवितहानी झाली नसल्याची माहिती अग्निशमन दलाने दिली. आग विझवण्यासाठी चार अग्निशमन गाड्या घटनास्थळी दाखल करण्यात आल्या होत्या. सुमारे दोन तासांच्या प्रयत्नांनंतर आग आटोक्यात आली. वाळलेल्या गवतामध्ये फेकलेल्या जळत्या वस्तूमुळे आग लागल्याचा प्राथमिक अंदाज व्यक्त करण्यात आला आहे.
पुणे : येरवडा येथील राज्य भूमी अभिलेख कार्यालयासमोरील मोकळ्या मैदानावर सोमवारी दुपारी लागलेल्या भीषण आगीत २० हून अधिक कार आणि सुमारे ५० दुचाकी जळून खाक झाल्या. सुदैवाने या घटनेत कोणतीही जीवितहानी झाली नाही, अशी माहिती शहर अग्निशमन दलाने दिली.
अग्निशमन दलाचे अधिकारी सोपान पवार यांनी सांगितले की, दुपारी १२.२६ वाजता आपत्कालीन कॉल प्राप्त झाला. त्यानंतर तात्काळ पथक घटनास्थळी दाखल झाले. आग विझवण्यासाठी चार अग्निशमन गाड्यांचा वापर करण्यात आला आणि सुमारे दोन तासांच्या प्रयत्नांनंतर आग नियंत्रणात आणली गेली.
मैदानावर उभी असलेली सर्व वाहने जळून खाक झाली असून त्यामध्ये सेवेतून बाद करण्यात आलेल्या चार सरकारी चारचाकी वाहनांचाही समावेश आहे. मोठ्या प्रमाणावर नुकसान झाले आहे.
प्राथमिक माहितीनुसार, वाहनांच्या परिसरात मोठ्या प्रमाणात वाळलेले गवत होते. एखाद्याने जळती सिगारेट किंवा माचिसची काडी फेकल्यामुळे आग लागली असावी, असा संशय व्यक्त करण्यात येत आहे. गवतामुळे आग झपाट्याने पसरून वाहनांना वेढा घातला.
आगीमुळे परिसरात दाट धुराचे लोट पसरले होते आणि ज्वाळा दूरवरूनही दिसत होत्या. घटनेचा अधिक तपास सुरू असल्याची माहिती अधिकाऱ्यांनी दिली.
