रमजान आणि निवडणुकांच्या पार्श्वभूमीवर कामगारांचा मायदेशी परतीचा निर्णय
हॉटेल व्यावसायिकांना कामगार टिकवणे कठीण; पर्यायी इंधनाचा शोध सुरू
केरळमध्ये सुरू असलेल्या एलपीजी टंचाईचा परिणाम हॉटेल आणि रेस्टॉरंट व्यवसायावर मोठ्या प्रमाणात दिसून येत आहे. स्वयंपाकासाठी गॅस उपलब्ध नसल्यामुळे अनेक ठिकाणी हॉटेल्स आणि खानावळी बंद ठेवाव्या लागत आहेत. याच पार्श्वभूमीवर मोठ्या प्रमाणावर स्थलांतरित कामगार आपल्या मूळ राज्यांकडे परतू लागले आहेत. रमजान सण जवळ येत असताना तसेच पश्चिम बंगाल आणि आसाममधील निवडणुकांमुळे या हालचालींना वेग मिळाला आहे. कामगार निघून गेल्यास ते परत येतील की नाही, याची चिंता हॉटेल व्यवसायिकांना सतावत आहे.
तिरुवनंतपुरम : एलपीजी गॅसच्या तीव्र टंचाईमुळे केरळमधील अनेक हॉटेल्स आणि रेस्टॉरंट्स बंद ठेवण्याची वेळ आली आहे. या परिस्थितीचा थेट परिणाम हॉस्पिटॅलिटी क्षेत्रातील स्थलांतरित कामगारांवर झाला असून ते आता आपल्या मूळ राज्यांकडे परतू लागले आहेत.
केरळ हॉटेल अँड रेस्टॉरंट असोसिएशन (KHRA) चे राज्य अध्यक्ष जी. जयपाल यांनी सांगितले की, साधारणपणे पश्चिम बंगाल आणि आसाममधील कामगार निवडणुकीच्या आठवडाभर आधी घरी जातात. मात्र सध्या सुरू असलेल्या एलपीजी संकटामुळे हॉटेल्स बंद पडत असल्याने अनेक कामगार यावेळी अपेक्षेपेक्षा लवकर निघत आहेत.
त्यांच्या मते, पुढील आठवड्यात रमजान सण सुरू होणार असल्याने परिस्थिती आणखी गुंतागुंतीची झाली आहे. रेस्टॉरंटमध्ये काम करणाऱ्या अनेकांना नोकरी नसल्यामुळे ते आपल्या राज्यात परतण्याचा निर्णय घेत आहेत. त्यामुळे निवडणुकांनंतरच ते पुन्हा केरळमध्ये परत येण्याची शक्यता असल्याचेही त्यांनी सांगितले.
जयपाल यांनी पुढे सांगितले की, हॉटेल चालक सध्या स्वयंपाकासाठी पर्यायी इंधनाचा शोध घेत आहेत. त्याचबरोबर कामगार लवकर निघून जाऊ नयेत यासाठी प्रयत्न केले जात आहेत. मात्र लहान हॉटेल व्यावसायिकांना दुकान बंद असताना कर्मचारी ठेवणे कठीण जात असल्याचे त्यांनी स्पष्ट केले.
सेंटर फॉर मायग्रेशन अँड इनक्लुसिव्ह डेव्हलपमेंट (CMID) चे बिनॉय पीटर यांनी सांगितले की केरळमधील स्थलांतरित कामगारांपैकी सुमारे 50 टक्के कामगार आसाम आणि पश्चिम बंगालमधून येतात. सध्या हॉटेल्स बंद असल्यामुळे हॉस्पिटॅलिटी क्षेत्रातील कामगार मायदेशी परतू लागले आहेत.
त्यांनी सांगितले की, रेस्टॉरंट्स बंद असणे, रमजान सण आणि आसाम-पश्चिम बंगालमधील निवडणुका या तिन्ही कारणांमुळे स्थलांतरित कामगारांच्या हालचालींना वेग आला आहे. तसेच या राज्यांकडे जाणाऱ्या रेल्वे गाड्यांमध्ये आरक्षित तिकिटांची मोठी प्रतीक्षा यादी असल्याचेही त्यांनी नमूद केले.
