मुंबई : पश्चिम आशियातील वाढत्या तणावाचा थेट परिणाम कच्च्या तेलाच्या किमतींवर दिसू लागला आहे. अमेरिका आणि इराण यांच्यातील चर्चा निष्फळ ठरल्याने तसेच होर्मुज सामुद्रधुनीत नाकेबंदीची शक्यता निर्माण झाल्याने आंतरराष्ट्रीय बाजारात तेलाचे दर झपाट्याने वाढले आहेत.
सोमवारी सुरुवातीच्या व्यवहारात ब्रेंट क्रूडचा दर सुमारे ८ टक्क्यांनी वाढून १०४ डॉलर प्रति बॅरलच्या पुढे गेला. तर यूएस बेंचमार्क वेस्ट टेक्सास इंटरमीडिएट (WTI) क्रूडमध्येही ८.६ टक्क्यांची उसळी पाहायला मिळाली. सध्या ब्रेंट क्रूड सुमारे १०२.३ डॉलर प्रति बॅरल, तर WTI क्रूड १०४.२ डॉलर प्रति बॅरल या पातळीवर व्यवहार करत आहे.
अमेरिकेने होर्मुज सामुद्रधुनीकडे जाणाऱ्या जहाजांवर निर्बंध घालण्याचे संकेत दिल्यानंतर बाजारात अनिश्चितता वाढली आहे. होर्मुज हा जागतिक तेल वाहतुकीसाठी अत्यंत महत्त्वाचा मार्ग असल्याने येथे कोणतीही अडचण निर्माण झाल्यास त्याचा थेट परिणाम जागतिक पुरवठ्यावर होतो.
तज्ज्ञांच्या मते, परिस्थिती पुन्हा संघर्षविरामापूर्वीच्या पातळीवर पोहोचत आहे. इराण दररोज सुमारे २ दशलक्ष बॅरल तेल निर्यात करत होता. मात्र, होर्मुज मार्ग बंद झाल्यास खाडीतील देशांच्या निर्यातीवर मोठा परिणाम होऊ शकतो. त्यामुळे जागतिक स्तरावर तेलटंचाई आणि दरवाढीचा धोका वाढला आहे.
