रत्नागिरी: रत्नागिरी जिल्ह्यामध्ये आगामी काही दिवसांत हवामानात मोठे बदल होण्याची शक्यता असून, तुरळक ठिकाणी विजांच्या कडकडाटासह हलका ते मध्यम पाऊस पडण्याचा अंदाज वर्तवण्यात आला आहे. डॉ. बाळासाहेब सावंत कोकण कृषी विद्यापीठ, दापोली आणि भारत मौसम विभाग यांच्या संयुक्त विद्यमाने प्रसिद्ध करण्यात आलेल्या कृषी सल्ला पत्रिकेनुसार, शेतकऱ्यांनी आपल्या पिकांची आणि जनावरांची काळजी घेण्यासाठी तातडीने उपाययोजना करण्याचे आवाहन करण्यात आले आहे.
विजांच्या कडकडाटासह पावसाची शक्यता
मुंबई प्रादेशिक हवामान केंद्राच्या अंदाजानुसार, २१ ते २५ एप्रिल दरम्यान जिल्ह्यात तुरळक ठिकाणी पावसाची शक्यता आहे. विशेषतः २१, २२ आणि २५ एप्रिल रोजी विजांच्या कडकडाटासह वादळे आणि ३०-४० किमी प्रतितास वेगाने सोसाट्याचा वारा वाहू शकतो. २४ एप्रिल रोजी वाऱ्याचा वेग ५० किमी प्रतितासपर्यंत वाढण्याची शक्यता असल्याने अधिक सतर्क राहण्याचा इशारा देण्यात आला आहे. तापमानातही वाढ होणार असून कमाल तापमान ३४ ते ३७ अंश सेल्सिअस दरम्यान राहण्याची शक्यता आहे.
बागायतदारांसाठी महत्त्वाचा कृषी सल्ला
-
आंबा व काजू: काढणीस तयार असलेला हापूस आंबा आणि काजू बियांची तातडीने काढणी करून त्या सुरक्षित ठिकाणी साठवाव्यात. काढणी सकाळी १० वाजेपूर्वी किंवा संध्याकाळी ४ नंतर करावी, जेणेकरून फळांचे तापमान नियंत्रित राहून ‘साका’ होण्याचे प्रमाण कमी होईल. नवीन लावलेल्या कलमांना तीव्र उन्हापासून वाचवण्यासाठी शेडनेट किंवा झावळ्यांचा वापर करून सावली करावी.
-
वणव्यापासून संरक्षण: उन्हात वाढ झाल्यामुळे बागांमध्ये वणवा लागण्याची शक्यता असते. त्यामुळे बागेच्या संरक्षणासाठी वणवा निरोधक पट्टे तयार करावेत.
-
इतर पिके: काढणीस तयार असलेल्या भुईमुगाची त्वरित काढणी करावी. तसेच भेंडी, मिरची, वांगी आणि टोमॅटो यांसारख्या फळभाज्यांची काढणी करून त्या सुरक्षित ठिकाणी ठेवाव्यात.
पशुधन आणि कुक्कुटपालनाची काळजी
विजांचा कडकडाट आणि वादळी वाऱ्याचा अंदाज पाहता, जनावरांना झाडाखाली न बांधता सुरक्षित गोठ्यात बांधावे. वाढत्या उष्णतेपासून संरक्षण करण्यासाठी त्यांना पुरेसे थंड व स्वच्छ पाणी उपलब्ध करून द्यावे आणि दुपारच्या वेळी चरण्यास बाहेर सोडू नये. कुक्कुटपालनामध्ये शेडच्या खिडक्या झाकून ठेवाव्यात आणि पक्षांच्या खाद्याचे नियोजन सकाळी लवकर किंवा संध्याकाळी करावे.
हवामानातील या बदलांमुळे शेतकऱ्यांनी सतर्क राहून आपल्या शेतीमालाचे नुकसान टाळण्यासाठी विद्यापीठाने दिलेल्या मार्गदर्शक सूचनांचे पालन करावे, असे आवाहन तज्ज्ञ समितीमार्फत करण्यात आले आहे.
