द्वितीय वर्षाच्या विद्यार्थ्याची तक्रार; वसतिगृहातील छळाचा आरोप
कॉलेज समितीने यापूर्वी आरोप फेटाळले; पोलिस तपास सुरू
पुण्यातील आयएलएस लॉ कॉलेजमध्ये रॅगिंग केल्याच्या आरोपांमुळे वाद निर्माण झाला आहे. द्वितीय वर्षाच्या ३५ वर्षीय विद्यार्थ्याने पाच वर्गमित्रांविरोधात तक्रार दाखल केली आहे. डेक्कन जिमखाना पोलिसांनी या प्रकरणी गुन्हा नोंदवून तपास सुरू केला आहे. विशेष म्हणजे, याच प्रकरणाची चौकशी कॉलेज समितीने यापूर्वी केली होती आणि रॅगिंग झाल्याचे नाकारले होते. आता पुन्हा या प्रकरणाने वेगळे वळण घेतले आहे.
पुणे : पुण्यातील आयएलएस लॉ कॉलेजमधील पाच विद्यार्थ्यांविरोधात रॅगिंग केल्याचा गुन्हा डेक्कन जिमखाना पोलिसांनी नोंदवला आहे. द्वितीय वर्षाच्या ३५ वर्षीय कायद्याच्या विद्यार्थ्याने ऑक्टोबर ते डिसेंबर २०२४ दरम्यान वसतिगृहात छळ केल्याचा आरोप करत ही तक्रार दाखल केली आहे.
तक्रारदार हा धाराशिव जिल्ह्यातील असून त्याने एफआयआरमध्ये पाच विद्यार्थ्यांची नावे नमूद केली आहेत. हे सर्व महाराष्ट्र आणि उत्तर भारतातील रहिवासी असल्याची माहिती आहे.
डेक्कन जिमखाना पोलिस ठाण्याच्या वरिष्ठ निरीक्षक गिरीशा निंबाळकर यांनी सांगितले की, महाराष्ट्र रॅगिंग प्रतिबंध कायदा १९९९ च्या कलम ३ आणि ४ अंतर्गत गुन्हा दाखल करण्यात आला आहे. तक्रारदाराने काही महिन्यांपूर्वी वरिष्ठ अधिकाऱ्यांकडे तक्रार केली होती आणि आता औपचारिक एफआयआर नोंदवण्यात आला.
तक्रारीनुसार, संबंधित पाच विद्यार्थी हे सुमारे २० वर्षांचे असून एलएलबीच्या द्वितीय वर्षात शिक्षण घेत आहेत. ते वसतिगृहात तक्रारदाराची चेष्टा करत आणि छेडछाड करत होते, ज्यामुळे त्यांच्यात वाद निर्माण झाला.
दरम्यान, कॉलेज प्रशासनाने यापूर्वी या प्रकरणाची चौकशी केली होती. आयएलएस लॉ कॉलेजच्या अधिकृत प्राचार्या दीपा पातुरकर यांनी सांगितले की, २०२४ मध्ये तक्रारीनंतर कॉलेज समितीने तपास करून अहवाल विद्यापीठ अनुदान आयोगाकडे सादर केला होता.
त्या अहवालात रॅगिंग झाल्याचे कोणतेही ठोस पुरावे आढळले नव्हते, असे त्यांनी स्पष्ट केले. यानंतर या प्रकरणावर कोणतीही चर्चा झाली नव्हती, मात्र आता अचानक पोलिस तक्रारीमुळे हा मुद्दा पुन्हा समोर आला आहे.
सध्या पोलिसांकडून तक्रारदार आणि कॉलेज प्रशासनाचा तपशीलवार जबाब नोंदवून तपास सुरू आहे.
