भारत आता ‘संधीची भूमी’; देशाच्या आकांक्षा अमर्याद झाल्या आहेत – पंतप्रधान नरेंद्र मोदी

पंतप्रधान नरेंद्र मोदी यांनी नेदरलँड्समधील हेग येथे भारतीय समुदायाला संबोधित करताना भारताच्या झपाट्याने होत असलेल्या परिवर्तनाचा उल्लेख केला. भारत आता केवळ बदलाची अपेक्षा करत नाही, तर जगातील सर्वोत्तम आणि सर्वात वेगवान देश बनण्याचे लक्ष्य ठेवत असल्याचे त्यांनी सांगितले. देशातील तरुणांची स्वप्ने आणि आकांक्षा आता सीमांपलीकडे गेल्याचेही त्यांनी नमूद केले. भारताने अलीकडेच यशस्वीपणे AI शिखर परिषद आणि G20 परिषद आयोजित केल्याचा उल्लेख करत त्यांनी देशाच्या वाढत्या जागतिक प्रभावावर भर दिला. तसेच भारताकडे जगातील तिसरे सर्वात मोठे स्टार्टअप नेटवर्क असल्याचेही त्यांनी सांगितले.


हेगमध्ये भारतीय समुदायाला मोदींचे संबोधन

हेग : पंतप्रधान नरेंद्र मोदी यांनी नेदरलँड्समधील हेग येथे भारतीय समुदायाला संबोधित करताना भारताच्या प्रगतीबाबत महत्त्वपूर्ण वक्तव्य केले. भारत आता “संधीची भूमी” बनला असून देश अभूतपूर्व परिवर्तनाच्या टप्प्यातून जात असल्याचे त्यांनी सांगितले.

आपल्या ४० मिनिटांहून अधिक कालावधीच्या भाषणात पंतप्रधान मोदी म्हणाले की, भारतातील लोकांची स्वप्ने आता केवळ मर्यादित राहिलेली नाहीत. देशातील तरुणांना मोठी उद्दिष्टे गाठण्याची प्रेरणा मिळत आहे आणि त्यामुळे भारतात प्रयत्नांचाही वेग वाढत आहे.

AI शिखर परिषद आणि G20 आयोजनाचा उल्लेख

नरेंद्र मोदी यांनी सांगितले की, भारताने अलीकडेच जगातील सर्वात मोठ्या आणि यशस्वी AI शिखर परिषदेचे आयोजन केले. त्याआधी भारताने यशस्वीपणे G20 शिखर परिषद आयोजित करून जागतिक स्तरावर आपली क्षमता सिद्ध केली.

ते म्हणाले की, हे केवळ एकदाच घडलेले नाही, तर आता हा भारताचा नवा चेहरा बनला आहे. भारताला आता फक्त परिवर्तन नको असून सर्वोत्तम आणि सर्वात वेगवान प्रगती साध्य करण्याची इच्छा असल्याचे त्यांनी स्पष्ट केले.

पंतप्रधानांनी भारताच्या स्टार्टअप इकोसिस्टमचेही कौतुक केले. भारताकडे जगातील तिसरे सर्वात मोठे स्टार्टअप नेटवर्क असल्याचे सांगत त्यांनी तरुण उद्योजकांच्या योगदानाचा विशेष उल्लेख केला. भारत जागतिक स्तरावर नव्या संधी निर्माण करत असून भविष्यात आणखी वेगाने प्रगती करेल, असा विश्वास त्यांनी व्यक्त केला.