NEET-UG 2026 पेपर लीक प्रकरणात केंद्रीय अन्वेषण ब्यूरोने मोठी कारवाई करत पुण्यातील जीवशास्त्राच्या प्राध्यापिकेला अटक केली आहे. राष्ट्रीय चाचणी संस्थेकडून तज्ज्ञ म्हणून नियुक्त करण्यात आलेल्या या प्राध्यापिकेवर प्रश्नपत्रिकेतील माहिती विद्यार्थ्यांपर्यंत पोहोचवल्याचा आरोप आहे. CBI च्या तपासात विद्यार्थ्यांसाठी खास कोचिंग क्लासेस घेण्यात आल्याची धक्कादायक माहिती समोर आली आहे. या प्रकरणात यापूर्वीही अनेक आरोपींना अटक करण्यात आली असून देशभरात छापेमारी सुरू आहे. NEET-UG परीक्षा रद्द झाल्यानंतर या प्रकरणामुळे देशभरात मोठा संताप व्यक्त केला जात आहे.
जीवशास्त्र प्राध्यापिकेवर प्रश्नपत्रिका लीकचा आरोप
पुणे : केंद्रीय अन्वेषण ब्यूरो (CBI) ने NEET-UG 2026 पेपर लीक प्रकरणात पुण्यातील जीवशास्त्राच्या प्राध्यापिका मनीषा गुरुनाथ मांधरे यांना अटक केली आहे. त्या नॅशनल टेस्टिंग एजन्सी (NTA) कडून तज्ज्ञ म्हणून नियुक्त करण्यात आल्या होत्या आणि यावर्षीच्या परीक्षा प्रक्रियेत त्यांचा सहभाग होता.
CBI च्या माहितीनुसार, मनीषा मांधरे यांना वनस्पतिशास्त्र आणि प्राणीशास्त्र विषयांच्या प्रश्नपत्रिकांमध्ये पूर्ण प्रवेश होता. एप्रिल 2026 मध्ये त्यांनी पुण्यातील मनीषा वाघमारे यांच्या मदतीने विद्यार्थ्यांची निवड करून खास कोचिंग क्लासेस आयोजित केले होते. या वर्गांमध्ये विद्यार्थ्यांना संभाव्य प्रश्न समजावून सांगण्यात आले आणि ते वहीत लिहून घेण्यास सांगितले गेले.
CBI कडून देशभरात छापेमारी सुरू
CBI ने सांगितले की, या वर्गांमध्ये शिकवण्यात आलेले अनेक प्रश्न आणि उत्तरे ३ मे रोजी झालेल्या NEET-UG 2026 च्या वास्तविक प्रश्नपत्रिकेशी जुळले. तपासादरम्यान गेल्या २४ तासांत देशभरातील सहा ठिकाणी छापे टाकण्यात आले असून लॅपटॉप, मोबाईल फोन आणि बँक स्टेटमेंट जप्त करण्यात आले आहेत.
या प्रकरणात आतापर्यंत एकूण नऊ आरोपींना अटक करण्यात आली आहे. यापूर्वी पुण्यातील रसायनशास्त्र प्राध्यापक पी. व्ही. कुलकर्णी यांनाही अटक करण्यात आली होती. त्यांच्यावर रसायनशास्त्राचे प्रश्न लीक केल्याचा आरोप आहे.
या प्रकरणातील इतर आरोपींमध्ये धनंजय लोखंडे, शुभम खैरनार, मांगीलाल बिवाल, विकास बिवाल, दिनेश बिवाल आणि यश यादव यांचा समावेश आहे. CBI ने शिक्षण मंत्रालयाच्या तक्रारीवरून १२ मे रोजी गुन्हा दाखल केला असून तपासासाठी विशेष पथक तयार करण्यात आले आहे.
