पदवीधर शिक्षकांच्या वेतन त्रुटी निश्चितीबाबत लेखी निवेदन सादर
खेड (प्रतिनिधी) : खेड पंचायत समितीच्या गटशिक्षणाधिकारीपदी संतोष भोसले यांची नुकतीच नियुक्ती झाल्याने शिक्षक समिती शाखा खेडच्या वतीने त्यांचा जाहीर सत्कार करण्यात आला. या प्रसंगी शिक्षक समितीच्या पदाधिकाऱ्यांनी त्यांचे अभिनंदन करत भावी शैक्षणिक वाटचालीसाठी शुभेच्छा दिल्या. तालुक्यातील शैक्षणिक क्षेत्राच्या विकासासाठी तसेच शिक्षकांच्या विविध प्रलंबित प्रश्नांच्या सोडवणुकीसाठी त्यांच्या नेतृत्वाखाली सकारात्मक कार्य होईल, असा विश्वासही यावेळी व्यक्त करण्यात आला.
संतोष भोसले यांनी यापूर्वी विविध शैक्षणिक जबाबदाऱ्या यशस्वीपणे सांभाळल्या असून त्यांच्या प्रशासकीय अनुभवाचा लाभ खेड तालुक्यातील शिक्षण क्षेत्राला होईल, अशी अपेक्षा शिक्षक समितीच्या पदाधिकाऱ्यांनी व्यक्त केली. सत्कार समारंभात शिक्षण क्षेत्रातील विविध विषयांवर चर्चा करण्यात आली. तालुक्यातील शाळांसमोरील अडचणी, शिक्षकांचे प्रश्न तसेच शैक्षणिक गुणवत्तावाढीसाठी आवश्यक उपाययोजनांबाबतही यावेळी विचारविनिमय झाला.
या कार्यक्रमादरम्यान शिक्षक समिती शाखा खेडच्या वतीने पदवीधर शिक्षकांच्या वेतन त्रुटी निश्चितीचा प्रश्न तातडीने मार्गी लावण्यात यावा, अशी मागणी करण्यात आली. संबंधित शिक्षकांच्या वेतन निश्चितीची प्रक्रिया पूर्ण करून प्रस्ताव त्वरित जिल्हा स्तरावर पाठविण्यात यावेत, यासाठी गटशिक्षणाधिकारी संतोष भोसले यांना सविस्तर लेखी निवेदन सादर करण्यात आले. शिक्षकांच्या प्रलंबित मागण्यांकडे गांभीर्याने लक्ष देऊन त्यांची योग्य ती कार्यवाही करण्यात यावी, अशी अपेक्षाही समितीच्या वतीने व्यक्त करण्यात आली.
यावेळी शिक्षक समितीचे तालुकाध्यक्ष संतोष चव्हाण, सचिव धर्मपाल तांबे, जिल्हा उपाध्यक्ष शरद भोसले, जिल्हा प्रतिनिधी राजेश भागणे, कार्याध्यक्ष अनिल यादव, उपाध्यक्ष श्रीकृष्ण खांडेकर, नरेश ठोंबरे, प्रवक्ते शैलेश पराडकर, दिलीप यादव, अजित भोसले, परशुराम पेवेकर, बबन मोरे, गजानन पालांडे, अनंत मोरे, मंगेश वायकर यांच्यासह शिक्षक समितीचे अनेक पदाधिकारी, सदस्य व शिक्षक मोठ्या संख्येने उपस्थित होते.
संपूर्ण कार्यक्रम उत्साहपूर्ण वातावरणात पार पडला असून नव्याने नियुक्त झालेल्या गटशिक्षणाधिकारी संतोष भोसले यांच्याकडून शिक्षक व विद्यार्थ्यांच्या हिताच्या दृष्टीने प्रभावी कामकाज होईल, अशी अपेक्षा उपस्थितांनी व्यक्त केली.
