दोडामार्ग | प्रतिनिधी
दोडामार्ग तालुक्यातील मेढे येथील एका ४३ वर्षीय युवकाने कीटकनाशक प्राशन करून आत्महत्या केल्याची दुर्दैवी घटना घडली. सुनील गोविंद गवस असे या मृत युवकाचे नाव असून, त्याच्या आत्महत्येचे नेमके कारण अद्याप स्पष्ट होऊ शकलेले नाही. सुनील यांच्या अचानक जाण्याने मेढे गावासह संपूर्ण परिसरात तीव्र हळहळ व्यक्त केली जात आहे.
शनिवारी दुपारच्या सुमारास सुनील गवस यांनी आपल्या राहत्या घरी कीटकनाशक प्राशन केले. काही वेळातच त्यांची प्रकृती बिघडल्याचे कुटुंबीयांच्या निदर्शनास आले. त्यांनी कोणतीही वेळ न घालवता सुनील यांना तातडीने दोडामार्ग येथील ग्रामीण रुग्णालयात उपचारासाठी दाखल केले.
गोव्यात उपचार सुरू असताना मृत्यू
ग्रामीण रुग्णालयात प्राथमिक उपचार केल्यानंतरही सुनील यांची प्रकृती अधिकच गंभीर बनली. त्यामुळे त्यांना पुढील तातडीच्या उपचारांसाठी गोव्यातील म्हापसा येथील ‘आजिलो’ रुग्णालयात हलविण्यात आले. मात्र, तेथेही त्यांच्या प्रकृतीत अपेक्षित सुधारणा न झाल्याने त्यांना तातडीने बांबोळी येथील ‘गोवा मेडिकल कॉलेज’ (GMC) मध्ये दाखल करण्यात आले. तेथे डॉक्टरांनी शर्थीचे प्रयत्न केले, मात्र उपचारादरम्यान त्यांची प्राणज्योत मालवली.
कुटुंबावर कोसळला दुःखाचा डोंगर
सुनील गवस यांच्या निधनाने गवस कुटुंबावर मोठा आघात झाला आहे. त्यांच्या पश्चात आई, पत्नी, तीन मुली, एक मुलगा आणि भाऊ असा मोठा परिवार आहे. त्यांच्या या अचानक जाण्याने संपूर्ण मेढे गावावर शोककळा पसरली असून, परिसरातून दुःख व्यक्त होत आहे.
