दापोली (विशेष प्रतिनिधी) : दापोली तालुक्यातील नारगोली येथे गुरुवारी सकाळी सुमारे ९ वाजण्याच्या सुमारास खेड-दापोली मार्गावर राज्य परिवहन महामंडळाच्या (एसटी) बस आणि कार यांच्यात अपघात झाला. या अपघातात खेड येथील विधी महाविद्यालयात परीक्षा देण्यासाठी निघालेल्या विद्यार्थ्यांच्या कारला एसटी बसची धडक बसली. सुदैवाने या अपघातात कोणतीही जीवितहानी झाली नसून मोठी दुर्घटना थोडक्यात टळली आहे.
मिळालेल्या माहितीनुसार, विद्यार्थी परीक्षा देण्यासाठी कारमधून खेडकडे जात असताना नारगोली परिसरात समोरून येणाऱ्या एसटी बस आणि कारचा संपर्क होऊन अपघात झाला. धडकेमुळे कारचे किरकोळ नुकसान झाले. मात्र, कारमधील विद्यार्थी तसेच एसटी बसमधील प्रवासी सुरक्षित असून कोणालाही दुखापत झालेली नाही.
अपघाताची माहिती मिळताच स्थानिक नागरिकांनी तातडीने घटनास्थळी धाव घेतली. त्यांनी वाहतूक सुरळीत करण्यासाठी मदत करत दोन्ही वाहने रस्त्याच्या बाजूला घेण्याचे काम केले. अपघातामुळे काही काळ खेड-दापोली मार्गावरील वाहतुकीवर परिणाम झाला होता. मात्र, स्थानिकांच्या सहकार्यामुळे वाहतूक लवकरच पूर्ववत करण्यात आली.
परीक्षेसाठी निघालेल्या विद्यार्थ्यांच्या वाहनाचा अपघात झाल्याने काही काळ परिसरात चिंतेचे वातावरण निर्माण झाले होते. मात्र, कोणतीही जीवितहानी अथवा गंभीर दुखापत झाली नसल्याने सर्वांनी सुटकेचा निश्वास सोडला. विद्यार्थ्यांवर ओढवू शकणारी मोठी दुर्घटना टळल्याने परिसरात समाधान व्यक्त करण्यात येत आहे.
दरम्यान, अपघाताचे नेमके कारण अद्याप स्पष्ट झाले नसून संबंधित यंत्रणांकडून घटनेची अधिक माहिती घेतली जात आहे. पोलिस आणि वाहतूक विभागाकडून या अपघाताची नोंद घेण्याची प्रक्रिया सुरू असल्याची माहिती मिळत आहे.
