७ दिवसांत बिगर शेती कर्ज आणि सचिवांना वर्षाला ९० लाखांचा निधी
सिंधुदुर्ग जिल्हा बँकेच्या माध्यमातून सावंतवाडीत ‘प्राथमिक विकास संस्था संवाद ‘
कर्जाची १०० टक्के वसुली करणाऱ्या विकास संस्थांचा बँकेतर्फे सत्कार
सावंतवाडी: “विकास सहकारी संस्थांना अधिक सक्षम, गतिमान आणि पारदर्शक करण्यासाठी सिंधुदुर्ग जिल्हा मध्यवर्ती सहकारी बँक कटिबद्ध असून, संस्थांच्या पाठीशी बँक खंबीरपणे उभी राहील,” असा ठाम विश्वास जिल्हा बँकेचे अध्यक्ष मनीष प्रकाश दळवी यांनी व्यक्त केला. सावंतवाडी येथील मंगिरीश हॉलमध्ये आयोजित ‘प्राथमिक विकास संस्था संवाद कार्यक्रमात’ बोलताना त्यांनी बँक आणि विकास संस्थांच्या सक्षमीकरणासाठी अनेक महत्त्वपूर्ण घोषणा केल्या.
विकास संस्थांना सक्षम करण्यासाठी बँकेने गेल्या पाच वर्षांत प्रत्येक संस्थेला दरवर्षी २० हजार रुपये व्यवस्थापन खर्च, सचिवांसाठी मेडिक्लेम इन्शुरन्स आणि उत्तम वसुलीसाठी बक्षीस योजना राबवली आहे, असे अध्यक्ष दळवी यांनी सांगितले. संस्थांच्या कारभारात सुसूत्रता आणण्यासाठी १४४ सचिवांच्या वेतन फरकाची ९० लाखांपेक्षा जास्त असणारी रक्कम संचालक मंडळाच्या मंजुरीने पुढील पाच वर्षे दरवर्षी ९० लाख रुपये बँक स्वतःच्या नफ्यातून देणार आहे. यामुळे संस्थांचा कारभार अधिक गतिमान होईल. तसेच, शेती व बिगर शेती कर्जासाठी लागणारा ९० ते १०० दिवसांचा कालावधी कमी करून नवीन प्रणालीद्वारे बिगर शेती कर्ज अवघ्या ७ दिवसांत मंजूर केले जाईल, अशी घोषणाही त्यांनी केली.
संस्थांच्या पायाभूत सुविधांच्या विकासासाठी नाबार्डच्या ४ टक्के व्याजदर योजनेअंतर्गत गोदाम बांधकामाकरिता मिळणाऱ्या ४० लाखांपर्यंतच्या कर्जातील १ टक्का व्याजही जिल्हा बँक स्वतः भरणार आहे. यामुळे संस्थांना हे कर्ज शून्य टक्के व्याजदराने उपलब्ध होणार असून, सध्या जिल्ह्यात २२ हून अधिक संस्थांमध्ये गोदामांचे बांधकाम सुरू आहे. याशिवाय पीक विमा योजनेत आंबा, काजू आणि भातासोबत आता सुपारी व नारळ पिकांचाही समावेश करण्यात आल्याचे त्यांनी नमूद केले.
या कार्यक्रमादरम्यान ३० जून २०२६ अखेर बँकेच्या कर्जाची १०० टक्के वसुली करणाऱ्या सावंतवाडी तालुक्यातील २० विकास संस्थांचा विशेष सत्कार करण्यात आला. यामध्ये आरोंदा, कोलगाव, स्थापेश्वर डेगवे, भावई क्षेत्रपाल कुणकेरी, आरोस, वाफोली (संस्था स्तरावरही १०० टक्के वसुली), सातार्डा, वेत्ये, चराठे, देवसू, चौकुळ, मळेवाड, शिरशिंगे, वेर्ले, बांदा, इन्सुली, आजगांव, माडखोल, कारिवडे आणि माजगांव या संस्थांचा समावेश आहे. १०० टक्के वसुलीच्या उंबरठ्यावर असलेल्या संस्थांच्या पदाधिकाऱ्यांचाही गुलाबपुष्प देऊन सन्मान करण्यात आला.
बँकेचे अध्यक्ष मनीष दळवी आणि बँक संचालक गजानन गावडे, महेश सारंग, रविंद्र मडगांवकर, विद्याधर परब यांच्या शुभहस्ते हा सत्कार सोहळा पार पडला. याप्रसंगी माजी संचालक गुरूनाथ पेडणेकर, मधुकर देसाई, गजानन सावंत, मुख्य कार्यकारी अधिकारी अनिरुद्ध देसाई, दत्ताराम गावडे, के. बी. वरक, वसंत हडकर, संजय डंबे, विलास धुरी, सौ. सोनाली चव्हाण, अमोल शिंदे यांच्यासह तालुक्यातील विविध संस्थांचे अध्यक्ष, उपाध्यक्ष, सचिव आणि सभासद मोठ्या संख्येने उपस्थित होते. कार्यक्रमाचे प्रास्ताविक मुख्य कार्यकारी अधिकारी अनिरुद्ध देसाई यांनी तर सूत्रसंचालन अमोल शिंदे यांनी पार पाडले.
