चतुश्रृंगी पोलिसांचा दावा – तपासाला मोठे यश
नेपाळी टोळीचा सहभाग, सात आरोपी फरार
बडतर्फ आयएएस प्रोबेशनर पूजा खेडकर यांच्या बाणेर रोडवरील बंगल्यावर झालेल्या दरोड्याप्रकरणी चतुश्रृंगी पोलिसांना महत्त्वाचे यश मिळाले आहे. मुख्य संशयित आरोपीच्या वडिलांना ठाणे जिल्ह्यातील कल्याण येथून अटक करण्यात आली आहे. या प्रकरणात सात जणांची नेपाळी टोळी सहभागी असल्याचा पोलिसांचा दावा आहे. दरोड्याच्या वेळी घरातील सदस्यांना मारहाण करून बांधून ठेवण्यात आले होते. पोलिस आता फरार आरोपींचा शोध आणि चोरीचा मुद्देमाल हस्तगत करण्यासाठी तपास वेगाने करत आहेत.
पुणे : 11 जानेवारीच्या रात्री बडतर्फ आयएएस प्रोबेशनर पूजा खेडकर यांच्या बाणेर रोडवरील बंगल्यावर झालेल्या दरोड्याप्रकरणी चतुश्रृंगी पोलिसांनी मुख्य संशयित आरोपीच्या वडिलांना अटक केल्याने तपासाला गती मिळाली आहे. खम्मो वीरबहादूर शाही (४०) असे अटक करण्यात आलेल्या संशयिताचे नाव असून, त्याला ठाणे जिल्ह्यातील कल्याण येथून ताब्यात घेण्यात आले.
सहायक पोलिस निरीक्षक अनिकेत पोटे आणि त्यांच्या पथकाने शाहीला शिवाजीनगर येथील न्यायदंडाधिकारी न्यायालयात हजर केले असता, न्यायालयाने त्याला १८ जानेवारीपर्यंत पोलिस कोठडी सुनावली. पोलिसांच्या माहितीनुसार, सात जणांच्या टोळीने दरोडा टाकल्यानंतर कल्याणमध्ये शाहीची भेट घेतली होती.
तपासात असे उघड झाले आहे की, शाहीचा मुलगा हिकमत आणि त्याचे इतर सहा साथीदार यांनी 11 जानेवारी रोजी रात्री 11.30 च्या सुमारास ही दरोडेखोरी केली. आरोपींनी पूजा खेडकर, त्यांचे आई-वडील, स्वयंपाकी, चौकीदार आणि चालक यांना बेदम मारहाण करून बांधून ठेवले. त्यानंतर लोखंडी रॉडच्या सहाय्याने कपाटे फोडून मौल्यवान वस्तू आणि मोबाईल फोन चोरून आरोपी पळून गेले.
महत्त्वाचे म्हणजे, हिकमतला नुकतेच घरकामगार म्हणून कामावर ठेवण्यात आले होते. दरोड्याच्या रात्रीच पूजा खेडकर यांनी पोलिसांना हिकमत हा गुन्ह्यात सहभागी असल्याचा संशय व्यक्त केला होता. मात्र, खेडकर यांचे सविस्तर जबाब अद्याप नोंदवायचे असून, चोरीस गेलेल्या मालमत्तेचा तपशील आणि किंमत निश्चित करणे बाकी आहे. त्यांच्या पालकांवर सध्या रुग्णालयात उपचार सुरू आहेत.
अनिकेत पोटे यांनी प्रहार डिजिटल ला सांगितले की, आरोपी मुंबईच्या दिशेने पळून गेल्याची माहिती पोलिसांना मिळाली होती. चौकशीत शाहीने कबूल केले की, घटनेनंतर त्याचा मुलगा त्याला भेटला, मात्र त्याने फरार आरोपींच्या ठावठिकाणाबाबत माहिती नसल्याचा दावा केला आहे. पोलिसांनी न्यायालयाकडे फरार आरोपींचा शोध, चोरीचा मुद्देमाल हस्तगत करणे आणि नेपाळी टोळीने यापूर्वी असे गुन्हे केले आहेत का याचा तपास करण्यासाठी कोठडीची मागणी केली आहे.
“`
