आंबोली | प्रतिनिधी :
पारंपारिक हार-तुरे आणि बुके यांच्या झगमगाटापेक्षा ज्ञानाची कवाडे उघडणाऱ्या पुस्तकांचे मोल अधिक असते, हे आंबोली परिसरातील दुर्गम अशा चौकुळ नं. ४ मराठी शाळेने कृतीतून सिद्ध केले आहे. फेब्रुवारी महिन्यातील शिक्षण परिषदेच्या निमित्ताने ‘फूल नाही, पुस्तक देऊया’ हा अभिनव उपक्रम राबवून या शाळेने शिक्षण क्षेत्रात एक नवा वस्तुपाठ घालून दिला आहे.
वाचनसंस्कृतीची पेरणी
शिक्षण परिषद म्हटली की, प्रामुख्याने प्रशासकीय कामकाज आणि शैक्षणिक नियोजनाची चर्चा डोळ्यासमोर येते. मात्र, चौकुळ केंद्राच्या या परिषदेत मुख्याध्यापक जावेद तांबोळी यांच्या संकल्पनेतून पाहुण्यांचे स्वागत फुलांऐवजी पुस्तके देऊन करण्यात आले. सत्कारमूर्तीला क्षणिक आनंद देणाऱ्या फुलांपेक्षा आयुष्यभर सोबत करणारे पुस्तक अधिक प्रभावी ठरते, हा विचार यामागे होता. उपस्थित केंद्रप्रमुख आणि शिक्षकांना स्त्री शिक्षणाच्या जननी सावित्रीबाई फुले यांच्या जीवनावर आधारित ‘साऊ’ हे प्रेरणादायी पुस्तक भेट देण्यात आले.
मूल्यसंवर्धनाचे नवे व्यासपीठ
या उपक्रमाचे कौतुक करताना केंद्रप्रमुख भावना गावडे म्हणाल्या की, “शिक्षण परिषद ही केवळ प्रशासकीय बैठक न राहता, मूल्यसंवर्धन आणि सकारात्मक विचारांची देवाणघेवाण करणारे व्यासपीठ ठरावे, हा या उपक्रमाचा मुख्य उद्देश आहे. ‘फूल नाही, पुस्तक देऊया’ हा संकल्प केवळ एका दिवसापुरता मर्यादित न ठेवता तो सातत्याने राबवण्याची गरज आहे.”
शैक्षणिक गुणवत्तावाढीवर मंथन
केवळ स्वागतच नव्हे, तर परिषदेतील चर्चाही तितकीच सकस झाली. दुर्गम भागातील विद्यार्थ्यांची गुणवत्ता कशी वाढवता येईल, अध्यापनात आधुनिक नवकल्पनांचा वापर कसा करावा आणि आगामी शैक्षणिक वर्षाचे नियोजन यावर सखोल मार्गदर्शन करण्यात आले. यावेळी डॉ. चंद्रकांत सावंत, अनिता कतगर, गजानन सोमवंशी, गोविंद पाटील, सचिन कोकितकर आणि जावेद तांबोळी यांनी विविध विषयांवर आपले विचार मांडले.
या परिषदेला केंद्र मुख्याध्यापक शितल गावडे, गोणसाठ शाळेचे मुख्याध्यापक एकनाथ सुतार, मळव शाळेचे मृणाल देसाई, केगद शाळेचे सुरेश पाटील, म्हाराठी बेरडकी शाळेचे काशिनाथ हसबे यांच्यासह केंद्रातील शिक्षक मोठ्या संख्येने उपस्थित होते. कार्यक्रमाचे आभार सत्यजित वेतूर्लेकर यांनी मानले.
