वृद्ध महिलांना लक्ष्य करून चोरीची युक्ती
सीसीटीव्ही तपासातून पोलिसांची मोठी कारवाई
पुणे आणि पिंपरी चिंचवड परिसरात बस प्रवाशांना लक्ष्य करणाऱ्या महिला चोरट्यांच्या टोळीचा पोलिसांनी पर्दाफाश केला आहे. या टोळीतील सहा महिलांना अटक करण्यात आली असून त्यांच्याकडून सोन्याचे दागिने जप्त करण्यात आले आहेत. वृद्ध महिला प्रवाशांना लक्ष्य करून चोरी केली जात असल्याचे तपासात समोर आले आहे. सीसीटीव्ही फुटेजच्या आधारे पोलिसांनी आरोपींचा माग काढला. ही टोळी गेल्या काही दिवसांपासून सक्रिय असल्याचेही उघड झाले आहे.
पुणे : बस प्रवाशांचे सोन्याचे दागिने चोरणाऱ्या सहा महिलांच्या टोळीला पिंपरी चिंचवड गुन्हे शाखेने रविवारी अटक केली. पोलिसांनी आरोपींकडून सुमारे ९० हजार रुपये किमतीचे सोन्याचे दागिने जप्त केले आहेत. ही कारवाई वरिष्ठ पोलीस निरीक्षक संतोष कसबे यांच्या नेतृत्वाखाली करण्यात आली.
गुन्हे शाखेच्या पथकाने भोसरी एमआयडीसी ते शिक्रापूर दरम्यानचे अनेक सीसीटीव्ही फुटेज तपासले आणि त्यानंतर शिक्रापूर येथून आरोपी महिलांना ताब्यात घेतले. प्रहार डिजिटलशी बोलताना कसबे यांनी सांगितले की, आरोपी महिला कर्नाटकातील छत्रपती संभाजीनगर आणि गुलबर्गा भागातील आहेत.
या टोळीची चोरीची पद्धत अत्यंत चलाख होती. आरोपी महिला पीएमपीएमएल किंवा एमएसआरटीसी बसमधून प्रवास करणाऱ्या वृद्ध महिलांना लक्ष्य करत असत. त्या नेहमी एका लहान बाळाला सोबत घेऊन प्रवास करत आणि टार्गेट निश्चित केल्यानंतर एक महिला तिच्या शेजारी बसत असे.
बाळाला दूध पाजण्याचा बहाणा करून इतर महिला त्या महिलेभोवती आडोसा तयार करत आणि त्याच वेळी वृद्ध प्रवाशांचे लक्ष विचलित करून त्यांचे दागिने किंवा पर्स चोरी करत. या प्रकारामुळे अनेक प्रवासी फसत होते.
चोरी केल्यानंतर आरोपी महिला लगेच पुढच्या थांब्यावर उतरून ऑटोरिक्षा किंवा इतर वाहनाने पळ काढत असत. पोलिसांनी शिक्रापूरपर्यंत अनेक ऑटोरिक्षा आणि ट्रकचे फुटेज तपासून या टोळीचा माग काढला.
गेल्या १५ दिवसांपासून ही टोळी पुणे आणि पिंपरी चिंचवड परिसरात सक्रिय होती. पोलिसांना संशय आहे की, बसमधील अलीकडील अनेक चोरींमध्ये त्यांचा सहभाग असू शकतो. आणखी गुन्हे घडण्यापूर्वीच आरोपींना पकडण्यात यश आले, असे कसबे यांनी सांगितले.
