प्रचार दौऱ्यातील ‘झालमुरी ब्रेक’वरून राजकारण तापले
ईव्हीएमवरही उपस्थित केला सवाल
पश्चिम बंगालच्या राजकारणात ‘झालमुरी’वरून वाद निर्माण झाला आहे. मुख्यमंत्री ममता बॅनर्जी यांनी पंतप्रधान नरेंद्र मोदी यांच्या प्रचार दौऱ्यातील एका घटनेवर निशाणा साधला आहे. हा प्रकार पूर्वनियोजित स्टंट असल्याचा त्यांनी आरोप केला आहे. यामुळे निवडणुकीच्या पार्श्वभूमीवर वातावरण अधिकच तापले आहे. तसेच ईव्हीएमबाबतही त्यांनी प्रश्न उपस्थित केले आहेत.
नवी दिल्ली : पश्चिम बंगालच्या मुख्यमंत्री ममता बॅनर्जी यांनी पंतप्रधान नरेंद्र मोदी यांच्या प्रचारादरम्यान झालेल्या ‘झालमुरी’ ब्रेकवर टीका केली आहे. हा संपूर्ण प्रकार पूर्वनियोजित असल्याचा आरोप करत त्यांनी भाजपवर निशाणा साधला.
बोबाजार येथील सभेत बोलताना ममता बॅनर्जी म्हणाल्या की, झारग्राममधील स्टॉलवर आधीच सुरक्षा व्यवस्था आणि कॅमेरे लावण्यात आले होते. झालमुरी घरातून तयार करून दुकानदाराला पैसे दिल्याचा दावा त्यांनी केला. हा प्रकार फक्त प्रचारासाठी केल्याचा आरोप त्यांनी केला.
‘झालमुरी’चा संदर्भ देत त्यांनी भाजपवर टीका करत आपण विविध राज्यांतील पदार्थ खात असल्याचे सांगत धर्मावरून राजकारण करू नये असा संदेश दिला. यापूर्वी ‘चायवाला’ दाखवले, आता ‘झालमुरी’ दाखवली जात आहे, अशी टीकाही त्यांनी केली.
ममतांनी पुढील टप्प्याच्या मतदानाआधी भाजपच्या आत्मविश्वासावर प्रश्नचिन्ह उपस्थित करत ईव्हीएमबाबत शंका व्यक्त केली. दरम्यान, नरेंद्र मोदी यांनीही सभेत ‘झालमुरी’चा उल्लेख करत भाजपच्या विजयाचा दावा केला होता.
राज्यात पहिल्या टप्प्यात 23 एप्रिल रोजी मतदान पूर्ण झाले असून दुसरा टप्पा 29 एप्रिलला पार पडणार आहे. निवडणूक आयोगानुसार 91.83% मतदानाची नोंद झाली असून 4 मे रोजी मतमोजणी होणार आहे.
