दरवाजा उघडताच पायाला हात लावून केला गोळीबार
३५ एकर जमिनीच्या वादातून हत्येची शक्यता
मध्य प्रदेशातील शिवपुरी येथे एका वृद्ध महिलेची थरारक पद्धतीने हत्या करण्यात आल्याची घटना समोर आली आहे. लग्नपत्रिका देण्याच्या बहाण्याने आलेल्या तिघांनी घराचा दरवाजा उघडून महिलेच्या पायाला हात लावत तिच्यावर गोळीबार केला. गंभीर जखमी अवस्थेत महिलेला रुग्णालयात नेण्यात आले, मात्र डॉक्टरांनी तिला मृत घोषित केले. जमिनीच्या वादातून ही हत्या घडल्याचा संशय व्यक्त केला जात आहे. पोलिसांनी आरोपींचा शोध सुरू केला असून परिसरात भीतीचे वातावरण निर्माण झाले आहे.
शिवपुरी : मध्य प्रदेशातील शिवपुरी जिल्ह्यात लग्नपत्रिका देण्याच्या बहाण्याने घरात प्रवेश करून एका वृद्ध महिलेची गोळ्या झाडून हत्या करण्यात आल्याची धक्कादायक घटना घडली आहे. या प्रकरणामुळे परिसरात मोठी खळबळ उडाली असून पोलिसांनी अज्ञात आरोपींविरोधात गुन्हा दाखल करून तपास सुरू केला आहे.
माहितीनुसार, रामसखी धाकड या आपल्या नातीसोबत घरात होत्या. त्यावेळी तिघेजण दुचाकीवरून त्यांच्या घरी आले. त्यांनी “लग्नाची पत्रिका द्यायची आहे” असे सांगत दरवाजा उघडण्यास सांगितले. रामसखी यांनी दरवाजा उघडताच आरोपींनी त्यांच्या पायांना स्पर्श केला आणि अचानक त्यांच्यावर गोळीबार केला. या घटनेने घरात एकच गोंधळ उडाला.
गोळीबारानंतर आरोपी घटनास्थळावरून फरार झाले. गंभीर जखमी झालेल्या रामसखी यांना कुटुंबीयांनी तातडीने रुग्णालयात दाखल केले. मात्र, डॉक्टरांनी तपासणीनंतर त्यांना मृत घोषित केले. या संपूर्ण घटनेची साक्ष त्यांच्या नातीने दिली असून, ती घाबरलेल्या अवस्थेत मोठ्याने ओरडू लागल्याचे सांगण्यात आले.
पोलिसांनी दिलेल्या माहितीनुसार, मृत रामसखी धाकड यांचे पती लक्ष्मी नारायण धाकड यांनी पहिल्या पत्नीच्या निधनानंतर त्यांच्यासोबत दुसरे लग्न केले होते. पहिल्या पत्नीपासून त्यांना तीन मुलगे आणि दोन मुली आहेत. तर रामसखी यांच्या पहिल्या पतीपासून मुनेश धाकड हा मुलगा आहे. सध्या मुनेश इंदूरमध्ये वास्तव्यास असून तो आईच्या उपचारासाठी गावात आला होता.
कुटुंबीयांच्या माहितीनुसार, लक्ष्मी नारायण यांच्या नावावर सुमारे ३५ एकर जमीन होती. या जमिनीचे पाच भाग करण्यात आले होते. रामसखी यांनी त्यांच्या वाट्याची जमीन मुलगा मुनेश यांच्या नावावर करण्याची प्रक्रिया सुरू केली होती. मात्र, याला कुटुंबातील काही सदस्यांचा विरोध होता. याच वादातून कट रचून ही हत्या करण्यात आल्याचा संशय व्यक्त केला जात आहे.
सध्या पोलिसांकडून आरोपींचा कसून शोध सुरू असून संपूर्ण प्रकरणाचा तपास करण्यात येत आहे. या घटनेमुळे परिसरात भीती आणि तणावाचे वातावरण निर्माण झाले आहे.
