सावंतवाडी, २० जून (प्रतिनिधी) :
आंतरराष्ट्रीय योग दिनाच्या पार्श्वभूमीवर सावंतवाडी नगरपरिषद, घे भरारी फाउंडेशन आणि फिटनेस योग अकॅडमी यांच्या संयुक्त विद्यमाने आयोजित ५ दिवसीय मोफत योगशिबिराचा प्रारंभ आज, शनिवार दि. २० जून रोजी सकाळी ६.३० वाजता जिमखाना हॉल येथे अत्यंत उत्साहात झाला.
या शिबिराचे शानदार उद्घाटन नगरसेविका सौ. मोहिनी मडगावकर यांच्या हस्ते दीपप्रज्वलनाने करण्यात आले. याप्रसंगी शिबिराचे अध्यक्ष म्हणून ज्येष्ठ योग शिक्षक श्री. शेखर बांदेकर उपस्थित होते.
या उद्घाटन सोहळ्याला फिटनेस योग अकॅडमीचे जिल्हाध्यक्ष श्री. नारायण सावंत, कोषाध्यक्ष श्री. रवींद्र प्रभू देसाई, फिटनेस किड्स अकॅडमीचे जिल्हाध्यक्ष श्री. विशाल लातये, फिटनेस महिला अकॅडमीच्या जिल्हाध्यक्षा सौ. रसिका सावंत, तसेच श्री. अरुण पवार, सौ. अनघा चव्हाण व सौ. चेतना शिंदे आदी मान्यवर प्रामुख्याने उपस्थित होते.
उद्घाटन सत्राची सांगता झाल्यानंतर प्रत्यक्ष योगसाधनेला सुरुवात झाली. योग शिक्षक श्री. शेखरजी बांदेकर यांनी उपस्थित साधकांना सूर्यनमस्कार, विविध आसने आणि प्राणायाम यांचे शास्त्रोक्त प्रात्यक्षिक करून घेतले. केवळ प्रात्यक्षिकेच नव्हे, तर प्रत्येक आसनाचे शरीराला होणारे फायदे आणि त्याची योग्य पद्धत याबद्दल त्यांनी अत्यंत उत्कृष्ट आणि सोप्या भाषेत मार्गदर्शन केले.
शिबिराच्या पहिल्याच दिवशी सावंतवाडीतील नागरिक, महिला व युवकांनी अतिशय मोठ्या संख्येने उपस्थित राहून उत्स्फूर्त सहभाग नोंदवला. फिटनेस योग अकॅडमी आणि सर्व आयोजकांनी सामाजिक भावनेतून सुरू केलेल्या या निःशुल्क उपक्रमाचे सावंतवाडीकरांमधून सर्व स्तरातून कौतुक होत आहे. हे शिबिर आगामी २४ जूनपर्यंत दररोज सकाळी ६.३० ते ८.३० या वेळेत जिमखाना हॉल येथे सुरू राहणार असून, जास्तीत जास्त नागरिकांनी याचा लाभ घ्यावा, असे आवाहन आयोजकांच्या वतीने करण्यात आले आहे.
