# १५ ऑगस्टपासून गाले येथे पहिल्या कसोटीला सुरुवात
सपोर्ट स्टाफच्या करारांवर पुनरावलोकन बैठकीत होणार अंतिम निर्णय
भारतीय क्रिकेट संघाच्या आगामी श्रीलंका कसोटी दौऱ्यासाठी संघाची घोषणा २८ जुलैपर्यंत होण्याची शक्यता आहे. बीसीसीआयचे सचिव देवजित सैकिया यांनी याबाबत माहिती दिली असून, पुढील दोन दिवसांत निवड समिती संघ जाहीर करणार असल्याचे सांगितले आहे. श्रीलंका दौऱ्यानंतर भारताच्या अलीकडील परदेश दौऱ्यांचाही सविस्तर आढावा घेतला जाणार आहे. तसेच मुख्य प्रशिक्षक गौतम गंभीर यांच्या सपोर्ट स्टाफमधील काही सदस्यांच्या कराराबाबतही महत्त्वाचा निर्णय होण्याची शक्यता आहे. त्यामुळे भारतीय क्रिकेटमध्ये आगामी काही दिवस महत्त्वाचे ठरणार आहेत.
मुंबई : भारतीय क्रिकेट नियामक मंडळ (बीसीसीआय) पुढील महिन्यात होणाऱ्या श्रीलंका कसोटी दौऱ्यासाठी भारतीय संघाची घोषणा मंगळवार, २८ जुलैपर्यंत करणार आहे. बीसीसीआयचे सचिव देवजित सैकिया यांनी प्रहार डिजिटलशी बोलताना पुढील दोन दिवसांत संघ जाहीर केला जाईल, अशी माहिती दिली.
या मालिकेतील पहिली कसोटी १५ ते १९ ऑगस्टदरम्यान गाले येथे खेळवली जाणार आहे. परदेशातील फिरकीपटूंविरुद्ध भारतीय फलंदाजांची ही मोठी कसोटी मानली जात आहे. तर दुसरी कसोटी २३ ते २७ ऑगस्टदरम्यान कोलंबो येथील एसएससी मैदानावर होणार आहे.
याशिवाय ऑगस्टच्या पहिल्या आठवड्यात आयर्लंड, इंग्लंड आणि झिम्बाब्वे दौऱ्यांतील भारतीय संघाच्या कामगिरीचा आढावा घेण्यासाठी बीसीसीआयची बैठक होणार आहे. श्रेयस अय्यर यांच्या नेतृत्वाखाली भारताला आयर्लंडविरुद्ध २-० आणि इंग्लंडविरुद्ध ४-० अशा पराभवांना सामोरे जावे लागले. त्यानंतर शुभमन गिल यांच्या नेतृत्वाखाली इंग्लंडविरुद्धची एकदिवसीय मालिका भारताने २-१ने गमावली.
मात्र झिम्बाब्वे दौऱ्यात भारतीय संघाने पुनरागमन करत पहिल्या टी-२० सामन्यात यजमानांचा सात विकेट्सने पराभव केला आणि मालिकेत १-० अशी आघाडी घेतली. हा श्रेयस अय्यर यांच्या नेतृत्वाखाली भारताचा सात सामन्यांनंतरचा पहिला विजय ठरला.
दरम्यान, मुख्य प्रशिक्षक गौतम गंभीर यांच्या सपोर्ट स्टाफमधील सहाय्यक प्रशिक्षक रायन टेन डोशेट आणि क्षेत्ररक्षण प्रशिक्षक टी. दिलीप यांच्या कराराची मुदत सध्याच्या व्हाईट-बॉल मालिकेनंतर संपत आहे. त्यांच्या कराराच्या मुदतवाढीबाबत अंतिम निर्णय बीसीसीआयच्या पुनरावलोकन समितीकडून घेतला जाणार आहे.
सूत्रांच्या माहितीनुसार, रायन टेन डोशेट आणि टी. दिलीप यांच्या कराराचे नूतनीकरण होण्याची शक्यता कमी मानली जात आहे. राहुल द्रविड यांच्या कार्यकाळात सपोर्ट स्टाफमध्ये सहभागी झालेले टी. दिलीप हे प्रत्येक सामन्यानंतर दिल्या जाणाऱ्या ‘सर्वोत्कृष्ट क्षेत्ररक्षक पदका’मुळे विशेष चर्चेत राहिले होते. मात्र अलीकडील काळात भारतीय संघाच्या क्षेत्ररक्षणाच्या दर्जाबाबत प्रश्नचिन्ह निर्माण झाले असून, त्याचाही आढावा बैठकीत विचार केला जाणार आहे.
