एन. सी. सी. ऑफिसर्स ट्रेनिंग अकॅडमी, ग्वाल्हेर येथे पार पडलेल्या रिफ्रेशर कोर्समध्ये सिंधुदुर्ग जिल्ह्यातील ५८ महाराष्ट्र बटालियन एनसीसीच्या अधिकारी लेफ्टनंट सुनेत्रा ढेरे यांनी गुणवत्ता यादीत देशात प्रथम क्रमांक पटकावून ‘कमांडंट गोल्ड मेडल’ मिळवले आहे. सध्या त्या देवगड महाविद्यालयात फिजिक्स विभागामध्ये प्राध्यापिका म्हणून कार्यरत आहेत. या अभूतपूर्व यशामुळे देवगड कॉलेज आणि संपूर्ण सिंधुदुर्ग जिल्ह्याच्या शिरपेचात मानाचा तुरा खोवला गेला आहे. हा रिफ्रेशर कोर्स ३१ ऑगस्ट ते १९ सप्टेंबर २०२६ या कालावधीत आयोजित करण्यात आला होता. या खडतर आणि आव्हानात्मक प्रशिक्षण कोर्समध्ये देशभरातून तब्बल ११७ एन.सी.सी. अधिकारी सहभागी झाले होते. या कोर्समध्ये आपत्ती व्यवस्थापन, मॅप रीडिंग, रायफल ड्रिल अशा विविध विषयांचे प्रशिक्षण आणि प्रात्यक्षिक अभ्यास करून घेण्यात आला. लेफ्टनंट सुनेत्रा ढेरे यांनी केवळ एकूण गुणवत्ता यादीतच प्रथम स्थान मिळवले नाही, तर त्यांनी आपल्या अष्टपैलू कामगिरीची छाप पाडत रायफल शुटिंग, सामाजिक उपक्रम आणि सांस्कृतिक कार्यक्रम इत्यादी मध्येही उत्कृष्टता दाखवली. एन सी सी अधिकारी होण्यासाठी २०२० मध्ये त्यांनी ग्वाल्हेर येथे तीन महिन्यांचे प्रशिक्षण यशस्वी रित्या पूर्ण करत पूर्व कमिशन प्रमाणपत्र मिळवून आर्मी मधील लेफ्टनंट रँक प्राप्त केली होती. सदर कोर्स नंतर लेफ्ट. सुनेत्रा यांना नजिकच्या काळात कॅप्टन रँक प्रदान करण्यात येणार आहे. हे दैदिप्यमान यश त्यांचे प्रामाणिक परिश्रम आणि योग्यता यांची साक्ष देते. त्यांच्या या यशाबद्दल ५८ महाराष्ट्र एनसीसीचे कमांडिंग ऑफिसर कर्नल अजयराज, ॲडम ऑफिसर लेफ्ट. कर्नल तनुज मंडलिक, तसेच संस्था पदाधिकारी, देवगड महाविद्यालयाचे प्राचार्य डॉ. विजयकुमार कुनुरे आणि सर्व स्तरांतून त्यांच्यावर अभिनंदनाचा वर्षाव होत आहे.
