सलग सहाव्यांदा प्रथम क्रमांकाच्या राज्यस्तरीय बँको ब्ल्यू रिबन २०२३ पुरस्काराने सन्मानित
लांजा( प्रतिनिधी) शहरातील कुणबी विकास सहकारी पतसंस्था मर्यादित लांजा या पतसंस्थेचा सलग सहाव्यांदा प्रथम क्रमांकाच्या राज्यस्तरीय ” बँको ब्ल्यू रिबन २०२३ ” पुरस्काराने गौरविण्यात आले. दमण येथे हा पुरस्कार वितरण सोहळा संपन्न झाला.
महाराष्ट्रातील सहकार क्षेत्रात ज्या सहकारी पतसंस्थांनी आपल्या कार्यक्षेत्रात अत्यंत उत्कृष्ट कार्य केले आहे. अशा सहकारी पतसंस्थाना अविज पब्लिकेशन , कोल्हापूर व गॅलेक्सी इनमा , पुणे यांचे संयुक्त विद्यमाने दरवर्षी बँको ब्ल्यू रिबन पुरस्काराचे आयोजन केले जाते.
सन २०२३ या वर्षासाठी बँको ब्ल्यू रिबन पुरस्कारासाठी संस्थेची आर्थिक स्थिती , व्यवस्थापन , आधुनिक तंत्रज्ञानाचा वापर , व्यवसाय वाढीसाठी केलेल्या नविन योजना इ. बाबत संपूर्ण माहितीच्या आधारे , तज्ञ निवड समितीने केलेल्या मूल्यांकनानुसार नागरी पतसंस्था ठेवी रु. ४० ते ४५ कोटीपर्यंत या विभागामध्ये सलग सहाव्या वर्षी राज्यस्तरीय प्रथम क्रमांकाचा ” बँको ब्ल्यु रिबन – २०२३ ” या पुरस्कारासाठी कुणबी विकास सहकारी पतसंस्था मर्या लांजा या पतसंस्थेची निवड करणेत आली होती.
दमण येथे ॲडव्हान्टेज २०२४ या राज्यस्तरीय सहकार परिषदेमध्ये राज्यस्तरीय प्रथम क्रमांकाचा ” बँको ब्ल्यू रिबन पुरस्कार मधुकरराव चौधरी (माजी सहकार आयुक्त पुणे )यांचे हस्ते प्रदान करण्यात आला. संस्थेचे अध्यक्ष चंद्रकांत परवडी, संचालक नंदकुमार आंबेकर व मुख्य कार्यकारी अधिकारी संदीप डाफळे यांनी तो स्विकारला. यावेळी संस्थेच्या सभासद सौ. निलांबरी परवडी व सौ. स्नेहल आंबेकर या उपस्थित होत्या.
