चिपळूण ता.आदिवासी आदिम सेवा व रोजगार सहकारी संस्थेचा उपक्रम
संस्था करणार वीट भट्टीतून रोजगार निर्मिती
चिपळूण (वार्ताहर) : तालुका आदिवासी आदिम सेवा व रोजगार सहकारी संस्थेच्या नव्याने सुरू होणाऱ्या चिंचघरी येथील वीट भट्टी प्रकल्पाचे उद्घाटन कुणबी समाजोन्नती संघ मुंबई शाखा ग्रामीण चिपळूणचे अध्यक्ष पत्रकार संतोष (भाई) कुळे यांच्या हस्ते करण्यात आले. यावेळी चेतना फाउंडेशनचे अध्यक्ष सचिन मोहिते सह अनेक मान्यवर आणि आदिवासी कातकरी समाजातील बांधव उपस्थित होते.
आदिवासी कातकरी समाज विकासाच्या प्रवाहात येण्यासाठी आदिवासी आदिम कातकरी संघटना महाराष्ट्र राज्याचे रत्नागिरी जिल्हा सचिव चंद्रकांत जाधव आणि इतर सहकारी नेहमी प्रयत्नशील आहेत. आपला समाज पुढे जावा यासाठी त्यांचे प्रयत्न सुरू आहेत. यातूनच चंद्रकांत जाधव यांनी समाजातील युवकांची चर्चा करून रोजगार निर्मितीसाठी काहीतरी साधन असावे यासाठी चिपळूण तालुका आदिवासी आदिम सेवा व रोजगार सहकारी संस्थेची स्थापना केली. स्थापना केल्यानंतर या संस्थेचे कामकाज सुरू झाले. या संस्थेने आपल्या समाजातील लोकांना रोजगार मिळावा यासाठी विट प्रकल्प सुरू करण्याचे स्वप्न डोळ्यासमोर ठेवले आणि ते प्रत्यक्षात आता पूर्ण होत आहे. याच वीटभट्टी प्रकल्पाचे उद्घाटन सोमवार दिनांक १६ डिसेंबर रोजी १२ बारा वाजता तालुक्यातील चिंचघरी येथे असलेल्या जागेत पत्रकार संतोष कुळे यांच्या हस्ते करण्यात आले. यावेळी संस्थेचे अध्यक्ष चंद्रकांत जाधव आणि सचिव सुरेश मोहिते यांनी या प्रकल्पासंदर्भातील उपस्थित त्यांना माहिती दिली.
संस्थेचे अध्यक्ष चंद्रकांत जाधव यांनी सांगितले की हा प्रकल्प पूर्ण करण्यासाठी किंवा या प्रकल्पाला अर्थसहाय्य म्हणून शबरी आदिवासी वित्त व विकास महामंडळ मर्यादित नाशिक यांच्याकडून अर्थसहाय्य प्राप्त झाले असून त्यांच्या मार्गदर्शनाखाली वीट भट्टी प्रकल्पाची उभारणी होत आहे. समाजातील बांधवांना एकाच ठिकाणी रोजगार मिळावा त्यांच्या कुटुंबाचा उदरनिर्वाह होण्यासाठी हा प्रकल्प आधार ठरणार आहे.
या संस्थेच्या माध्यमातून भविष्यात अनेक छोटे-मोठे उद्योग करण्याचा मानस सुद्धा त्यांनी यावेळी व्यक्त केला. या
प्रकल्पाचे उद्घाटन करताना पत्रकार संतोष कुळे यांनी सुद्धा या आदिवासी आदिम सेवा व रोजगार सहकारी संस्थेचे कौतुक केले. कमी कालावधीमध्ये या संस्थेने वीट प्रकल्प सुरू करण्याचे स्वप्न पाहिले आणि ते आता प्रत्यक्षात उतरत आहे. वीट भट्टी प्रकल्प सुरू करणे तसे धाडसाचे काम आहे. परंतु या संस्थेच्या सर्व पदाधिकारी आणि संचालक यांनी यासाठी मेहनत घेत मोठे पाऊल उचलले आहे. निश्चितच हा विट भट्टी प्रकल्प पुढे जाऊन कातकरी समाजाला रोजगार देणारा एक मोठा प्रकल्प होईल असे त्यांनी सांगितले. संस्थेने यासाठी एक डंपर आणि ट्रॅक्टर खरेदी केला आहे . याकरता शबरी आदिवासी वित्त व विकास महामंडळ मर्यादित नाशिक यांनी आर्थिक सहाय्य करून त्यांच्या कामाला हातभार लावलेला आहे. स्थलांतरित जीवन जगण्याची पद्धत यामुळे थोडीफार कमी होऊ शकते. एकाच ठिकाणी कातकरी बांधवांना रोजगार उपलब्ध झाला तर निश्चितच त्यांच्या कुटुंबाचा आर्थिक स्तर उंचावण्यात मदत होईल असे त्यांनी बोलताना सांगितले.
या कार्यक्रमाला चेतना फाउंडेशनचे अध्यक्ष सचिन मोहिते, भीम सैनिक युवा प्रतिष्ठान चिपळूणचे अध्यक्ष शुभम कदम, पदाधिकारी प्रफुल्ल मोहिते, अजय पवार, संकेत मोहिते, आकाश कांबळे, पत्रकार गौरव तांबे, संस्थेचे संचालक सिद्धार्थ पवार,
मंगेश हिलम, मंगेश हिलम, महेंद्र निकम कुटरे,
राजु पवार, श्रीकांत पवार, संतोष हिलम, रोहित पवार,
संदिप पवार, सौ. रेश्मा जाधव, सुरेखा पवार, आणि कामगार उपस्थित होते.
कार्यक्रमाचे सुत्रसंचालन सचिव सुरेश पवार यांनी केले तर आभार अध्यक्ष चंद्रकांत जाधव यांनी मानले.
