Rape and pressure for conversion.., complaint of model in Mumbai, crime against young man in Ranchi
मुंबई : झारखंडची राजधानी रांचीमध्ये एक संस्था चालवणाऱ्या तनवीर अख्तर मोहम्मद खान याने तिच्यावर बलात्कार केला आणि धर्मांतरासाठी दबाव टाकल्याची तक्रार मुंबईतील एका तरुण मॉडेलने केली आहे. या प्रकरणी वर्सोवा पोलिसांनी बलात्काराचा गुन्हा दाखल करून पुढील तपासासाठी हे प्रकरण रांची पोलिसांकडे वर्ग केले आहे.
तक्रारदार ही मूळची बिहारची असून रांची येथे मॉडेलिंग वर्कशॉपसाठी आली होती. तिथे ती तनवीरच्या संपर्कात आली. मॉडेलने आरोप केला आहे की त्याने 2021 पासून वारंवार तिच्यावर बलात्कार केला आणि तिने ही बाब कोणाला सांगितल्यास नग्न फोटो व्हायरल करण्याची धमकी दिली, असे तक्रारीत म्हटले आहे. नंतर, जेव्हा तरुणी मॉडेलिंगमध्ये करिअर करण्यासाठी मुंबईला जाण्याचा विचार करत होती, तेव्हा तनवीरने तिच्यावर धर्म बदलून लग्न करण्यासाठी दबाव आणला. नाव बदलण्यासाठीही दबाव टाकण्यात आला. शूटिंगसाठी बँकॉकला येण्यास सांगितले. तरुण मॉडेलने नकार दिल्यावर त्याने हे फोटो तिच्या आई आणि भावाला पाठवले आणि तिचे आक्षेपार्ह फोटो व्हायरल करण्याची धमकी दिली. तिच्या नातेवाईकांनी तिला तक्रार करून पुढे जाण्यास सांगितले.
बनावट आयडी आणि त्रास
आरोपींनी तिच्यावर बँकॉकला येण्यासाठी दबाव टाकल्याने ती बँकॉकला गेली. तेथेही आरोपीने तिच्यावर अत्याचार केला. मुंबईत आल्यानंतरही तनवीरचा त्रास सुरू झाला. तरुणीने याआधी आरोपीविरुद्ध तक्रार दाखल केली होती. शिवाय, आरोपींनी तिच्या नावाने बनावट आयडी बनवून तिला त्रास देण्यासाठी आक्षेपार्ह फोटो शेअर करून जीवे मारण्याची धमकी दिली. त्यानुसार वर्सोवा पोलिसांनी गुन्हा दाखल केला.
