Over 200 dead, 900 injured in Odisha train accident
ओडिशा : ओडिशाच्या बालासोर जिल्ह्यातील बेहनागा रेल्वे स्थानकाजवळ शुक्रवारी (2 जून) संध्याकाळी एक मोठा रेल्वे अपघात झाला.
कोरोमंडल एक्सप्रेस आणि मालगाडी दोन्ही एकाच वेळी एकाच रुळावर आल्याने हा भीषण अपघात झाला. या अपघातात अनेक प्रवाशांचा मृत्यू झाला असून मृतांचा आकडा 200 च्या पुढे गेला आहे. 900 प्रवासी जखमी झाल्याची माहिती अधिकाऱ्यांनी दिली आहे. तसेच हा भारतातील सर्वात भीषण रेल्वे अपघात असून मृतांचा आकडा आणखी वाढण्याची शक्यता अधिकाऱ्यांनी व्यक्त केली आहे.
बालासोरमधील बेहनागा स्थानकाजवळ झालेल्या अपघातानंतर आतापर्यंत 18 गाड्या रद्द करण्यात आल्या असून अनेक गाड्या वळवण्यात आल्या आहेत.
या संदर्भात बीबीसीने दिलेल्या माहितीनुसार, ओडिशाचे मुख्य सचिव प्रदीप जेना यांनी सांगितले की, बालासोर जिल्ह्यात 200 हून अधिक रुग्णवाहिका घटनास्थळी रवाना करण्यात आल्या आहेत.
ओडिशाच्या अग्निशमन विभागाचे महासंचालक सुधांशू सारंगी यांनी सांगितले की, आतापर्यंत 207 मृतदेह बाहेर काढण्यात आले आहेत.
या संदर्भात रेल्वे मंत्री अश्विनी वैष्णव यांनी एका ट्विटद्वारे सांगितले की, ते ओडिशातील अपघातस्थळी जात आहेत. मी जखमी प्रवाशांच्या लवकरात लवकर बरे होण्यासाठी प्रार्थना करतो आणि त्यांच्या कुटुंबियांप्रती माझ्या संवेदना व्यक्त करतो. भुवनेश्वर आणि कोलकाता येथून बचाव पथके रवाना करण्यात आली आहेत. एनडीआरएफ, राज्य सरकारची टीम आणि हवाई दलही तैनात करण्यात आले आहे. आम्ही बचावकार्यासाठी सर्वतोपरी प्रयत्न करत आहोत.
भारताचे पंतप्रधान नरेंद्र मोदी यांनीही या घटनेवर शोक व्यक्त केला आहे. “दुर्घटनास्थळी बचावकार्य सुरू असून बाधितांना सर्व शक्य मदत केली जात आहे,” असे त्यांनी ट्विट केले.
दरम्यान, एएनआय या वृत्तसंस्थेनुसार, अपघातातून बचावलेल्या एका व्यक्तीने सांगितले की, अपघात झाला तेव्हा 10 ते 15 लोक माझ्यावर पडले आणि मी ढिगाऱ्याच्या तळाशी होतो.
“माझ्या हाताला आणि मानेच्या मागच्या बाजूला दुखापत झाली होती. मी ट्रेनच्या डब्यातून बाहेर आलो तेव्हा मी पाहिले की कोणीतरी हात गमावला आहे, कोणाचा पाय गमावला आहे आणि कोणाचा चेहरा विद्रूप झाला आहे,” असे एका वाचलेल्या व्यक्तीने ANI ला सांगितले.
अपघात नेमका कशामुळे झाला?
कोरोमंडल एक्सप्रेस आणि मालगाडी दोन्ही एकाच रुळावर आल्याने हा अपघात झाला. सिग्नल यंत्रणेतील बिघाडामुळे दोन्ही गाड्या एकाच वेळी एकाच रुळावर आल्याचे सांगण्यात येत आहे. कोरोमंडल एक्सप्रेस पश्चिम बंगालमधील हावडामार्गे चेन्नई ते ओडिशा धावते.
