संशयिताकडून ७१ हजारांचा मुद्देमाल जप्त
सावंतवाडी: कोलगाव येथील फणसवाडी भागात पोलिसांनी छापा टाकून गोवा बनावटीची दारू बेकायदेशीरपणे विक्रीसाठी साठवणूक करणाऱ्या एका आरोपीला अटक केली आहे. पोलिसांनी आरोपीकडून ७१ हजार ९०० रुपये किमतीची गोवा बनावटीची दारू जप्त केली आहे. ही कारवाई पोलीस निरीक्षक खंदारकर यांच्या नेतृत्वाखालील पथकाने केली.
या प्रकरणी मिळालेल्या माहितीनुसार, कोलगाव येथील फणसवाडी भागात राहणारा एजाज नासीर शेख (वय ४१) हा आपल्या घराच्या मागच्या बाजूला गोवा बनावटीची दारू बेकायदेशीरपणे विक्रीसाठी साठवत असल्याची माहिती पोलिसांना मिळाली होती. या माहितीच्या आधारे पोलीस निरीक्षक खंदारकर यांनी उपनिरीक्षक सरदार पाटील, हवालदार सुरेश पाटील, धोत्रे, राऊत यांच्यासह एक पथक तयार करून संबंधित ठिकाणी छापा टाकला.
या छाप्यात पोलिसांनी एजाज शेखच्या घरातून गोवा बनावटीची विविध ब्रँडची दारू जप्त केली. जप्त केलेल्या दारूची किंमत सुमारे ७१,९०० रुपये असून, पोलिसांनी आरोपी एजाज शेखला ताब्यात घेतले आहे. त्याच्या विरोधात सावंतवाडी पोलीस ठाण्यात गुन्हा दाखल करण्यात आला असून, पुढील तपास सुरू आहे.
या कारवाईमुळे परिसरात बेकायदेशीर दारू विक्री करणाऱ्यांचे धाबे दणाणले आहेत.
