कृषी विभागमार्फत अत्याधुनिक तंत्रज्ञानाचा वापर करण्याचे आवाहन
मसुरे | झुंजार पेडणेकर : महाराष्ट्र शासनाच्या कृषी विभागाने राज्यातील शेतकऱ्यांसाठी ‘महाविस्तार-AI’ (MahaVISTAAR-AI) हे अत्याधुनिक मोबाईल ॲप लॉन्च केले असून, या ॲपचा जास्तीत जास्त वापर करण्याचे आवाहन कणकवली उपविभागीय कृषी अधिकारी उमाकांत पाटील यांनी केले आहे. शेतीत आर्टिफिशियल इंटेलिजन्स (AI) आणि डिजिटल तंत्रज्ञानाचा वापर करून शेतकऱ्यांचे जीवनमान अधिक सुलभ आणि शेती अधिक फायदेशीर करण्याच्या उद्देशाने हे ॲप तयार करण्यात आले आहे.
*शेतकऱ्यांच्या प्रश्नांवर ‘AI’ची उत्तरे*
‘महाविस्तार-AI’ ॲप हे शेतकऱ्यांसाठी एका डिजिटल सहाय्यकाप्रमाणे (Digital Assistant) काम करते. हे ॲप शेतकऱ्यांच्या विविध गरजा पूर्ण करण्यासाठी एकाच ठिकाणी सर्व माहिती उपलब्ध करून देते.
ॲपची प्रमुख वैशिष्ट्ये पुढील प्रमाणे आहेत.
पीक सल्ला आणि मार्गदर्शन: पेरणीच्या पद्धती, खतांचा वापर, पाणी व्यवस्थापन आणि पीक संरक्षणाबद्दल वेळेवर आणि अचूक माहिती मिळते.
हवामान अपडेट्स: शेतीसाठी अत्यंत आवश्यक असलेले रिअल-टाईम हवामान अंदाज आणि कृषी हवामान सल्ला मिळतो.(Agromet Advisory).
बाजारभाव: राज्यातील कृषी उत्पन्न बाजार समित्यांमधील (APMC) शेतमालाचे ताजे बाजारभाव उपलब्ध होतात.
* कीड आणि रोग निदान: पिकांवरील कीड आणि रोगांची माहिती तसेच त्यांच्या नियंत्रणासाठीचे सोपे उपाय समजतात.
* शासकीय योजना: कृषी विभागाच्या विविध शासकीय योजनांची माहिती आणि अर्ज करण्याची प्रक्रिया.
* शेतकरी समुदाय: ॲपद्वारे इतर शेतकऱ्यांशी आणि कृषी तज्ञांशी जोडले जाण्याची सोय.
* मराठीसह अनेक भाषांमध्ये उपलब्धता: शेतकऱ्याला त्याच्या सोयीनुसार माहिती उपलब्ध आहे.
उपविभागीय कृषी अधिकारी कणकवली उमाकांत पाटील यांनी सांगितले की, “शेतकऱ्यांना अनेकदा माहितीसाठी विविध ठिकाणी भटकावे लागते किंवा चुकीच्या माहितीमुळे नुकसान होते. ‘महाविस्तार-AI’ ॲपमुळे शेतकऱ्यांना विश्वासार्ह, वैयक्तिकृत आणि वेळेवर सल्ला मिळणार आहे. ॲपमध्ये AI तंत्रज्ञानाचा वापर केल्यामुळे शेतकऱ्याने बोलून किंवा लिहून विचारलेल्या प्रश्नांची उत्तरे त्याच्या स्थानिक भाषेत त्वरित मिळतील.”
या ॲपमुळे शेतीतील उत्पादकता वाढण्यास, खर्च कमी होण्यास आणि योग्य निर्णय घेण्यास मदत होईल. शेतकऱ्यांनी त्वरित गुगल प्ले स्टोअरवरून (Google Play Store) हे ॲप मोफत डाउनलोड करावे आणि त्याचा वापर सुरू करावा, असे आवाहन कृषी विभागाने केले आहे.
तंत्रज्ञान आणि डेटा-आधारित शेतीला प्रोत्साहन देण्यासाठी ‘महाविस्तार-AI’ हे त्या दिशेने महाराष्ट्र शासन कृषी विभागाने टाकलेले एक महत्त्वाचे पाऊल आहे.
अधिक माहिती आणि मदतीसाठी, शेतकरी नजीकच्या कृषी कार्यालयात संपर्क साधू शकतात.
