सावंतवाडी । प्रतिनिधी : मुंबई-बेळगाव राज्य मार्गावरील कोलगाव निरुखेवाडी येथील सिनेमा थिएटर परिसरात मुख्य रस्त्यावर मोरी खचल्याने मोठा धोका निर्माण झाला आहे. सार्वजनिक बांधकाम विभागाने या खचलेल्या मोरीजवळ केवळ बॅरेल ठेवून तात्पुरती उपाययोजना केल्यामुळे अपघात होण्याची भीती वाढली आहे. स्थानिकांनी या गंभीर धोक्याकडे लक्ष वेधून सार्वजनिक बांधकाम विभागास तातडीने कायमस्वरूपी दुरुस्ती करण्याची आणि भविष्यात कोणतीही हानी होऊ नये यासाठी खबरदारी घेण्याची मागणी केली आहे.
हा रस्ता मुंबई आणि बेळगावला जोडणारा मुख्य राज्य मार्ग असल्यामुळे या मार्गावरून दररोज मोठ्या प्रमाणात अवजड आणि हलकी वाहने ये-जा करतात. मोरी खचल्यामुळे रस्त्याच्या मधोमध मोठा खड्डा पडला असून, प्रशासनाने केवळ बॅरेल ठेवून नागरिकांना सावध केले आहे.
मात्र, रात्रीच्या वेळी रस्त्यावर पुरेसा प्रकाश नसल्याने, तसेच हे बॅरेल स्पष्टपणे न दिसल्यास, भरधाव वेगाने येणाऱ्या वाहनांचे गंभीर अपघात होण्याची मोठी शक्यता आहे. विशेषतः अवजड वाहनांसाठी हा धोका अधिक आहे.
या पार्श्वभूमीवर, सार्वजनिक बांधकाम विभागाच्या अधिकाऱ्यांनी या तात्पुरत्या उपायाऐवजी तात्काळ कायमस्वरूपी उपाययोजना करावी आणि हा धोका दूर करावा, अशी आग्रही मागणी कोलगाव आणि निरुखेवाडी परिसरातील नागरिकांनी केली आहे. नागरिकांच्या सुरक्षेसाठी प्रशासनाने या गंभीर समस्येकडे त्वरित लक्ष देणे आवश्यक आहे.
