खेड (प्रतिनिधी) – खेड तालुक्यातील फुरूस या गावात बेकायदेशीररीत्या गुटखा विक्री करणाऱ्या एका व्यक्तीविरुद्ध पोलिसांनी कारवाई करत मोठ्या प्रमाणावर नशाकरक पदार्थ जप्त केला आहे. हा प्रकार दिनांक १ नोव्हेंबर २०२५ रोजी दुपारी साडेतीनच्या सुमारास घडला असून, या प्रकरणी पोलिसांनी २ नोव्हेंबर २०२५ रोजी सायंकाळी ६.५४ वाजता गुन्हा नोंदवला आहे.
खेड पोलिस ठाण्यात नोंद झालेल्या गुन्हा क्रमांक ३३१/२०२५ नुसार आरोपी वाहिद अब्दुल कादीर परकार (वय ५१ वर्षे, रा. फुरूस बौद्धवादी, ता. खेड) याने स्वतःच्या टेलरिंग दुकानातून बेकायदेशीररित्या ‘विमल पान मसाला’ व ‘तंबाखू’ या नशाकरक पदार्थांची विक्री केली होती. हा पदार्थ आरोग्यास अपायकारक असून, त्याची विक्री महाराष्ट्र शासनाने बंदी घातलेली आहे. तरीही आरोपीने जाणूनबुजून हे पदार्थ विक्रीसाठी ठेवले होते. फिर्यादी पूजा आशिष हिरेमठ, सहा. पोलीस निरीक्षक, दापोली पोलीस ठाणे यांनी दिलेल्या माहितीनुसार, आरोपीकडून एकूण २०,७२० रुपयांचा मुद्देमाल जप्त करण्यात आला. या मुद्देमालामध्ये पांढऱ्या रंगाच्या “विमल पान मसाला” असे लिहिलेल्या कापडी पिशव्यांमधील २५ पाकिटे (प्रत्येकात १२ पाऊच), निळ्या रंगाच्या “विमल तंबाखू” लिहिलेल्या २२ पाकिटे (प्रत्येकात २२ पाऊच) तसेच चॉकलेटी रंगाच्या “विमल पान मसाला” या ब्रँडच्या ३० पाकिटांचा समावेश आहे.
हा सर्व नशाकरक पदार्थ आरोपीने विनापरवाना विक्रीसाठी ठेवले होते. पोलिसांनी मिळालेल्या गुप्त माहितीनुसार छापा टाकून हा मुद्देमाल जप्त केला. आरोपीवर भारतीय न्यायसंहिता अधिनियम २०२३ अंतर्गत कलम १२३, २२३, २७५ तसेच मानक कायद्यानुसार कलम ५ अंतर्गत गुन्हा दाखल करण्यात आला आहे. या कारवाईनंतर परिसरातील नागरिकांमध्ये समाधानाचे वातावरण असून, पोलिसांनी अशा बेकायदेशीर व्यापारावर कठोर कारवाई सुरू ठेवण्याचा निर्धार व्यक्त केला आहे. खेड–दापोली विभागात आरोग्य व कायद्याची पायमल्ली करणाऱ्यांविरोधात पोलिसांकडून पुढील तपास सुरू आहे.
