आंतर-जिल्हा राष्ट्रीय स्पर्धेसाठी संघ निवडणार
ओरोस । प्रतिनिधी : सिंधुदुर्ग जिल्हा हौशी ॲथलेटिक असोसिएशनच्या वतीने १४ आणि १६ वर्षांखालील मुलांसाठी जिल्हास्तरीय ॲथलेटिक मीटचे आयोजन करण्यात आले आहे. ही स्पर्धा १ डिसेंबर रोजी सकाळी ८ वाजता ओरोस येथील क्रीडा संकुल येथे सुरू होईल.
या मीटमधून आणि अस्मिता लीग मधून एकूण १३ मुलांची निवड केली जाणार आहे. निवडलेला हा संघ आंतर-जिल्हा राष्ट्रीय ॲथलेटिक स्पर्धेत जिल्ह्याचे प्रतिनिधित्व करेल. राष्ट्रीय स्पर्धेसाठी निवड करण्यापूर्वी खेळाडूंचे शिबिर आयोजित केले जाईल आणि केवळ या शिबिरात सहभागी होणाऱ्या खेळाडूंनाच संघात संधी दिली जाईल.
गटांनुसार जन्म तारखेचे निकष पुढीलप्रमाणे आहेत:
१४ वर्षांखालील मुले: ज्यांचा जन्म २१ डिसेंबर २०११ ते २० डिसेंबर २०१३ या कालावधीत झाला आहे.
१६ वर्षांखालील मुले: ज्यांचा जन्म २१ डिसेंबर २००९ ते २० डिसेंबर २०११ या कालावधीत झाला आहे.
स्पर्धेतील क्रीडा प्रकार आणि शुल्क:
१४ वर्षांखालील मुलांसाठी ट्रायथलॉन प्रकारात स्पर्धा होईल. खेळाडूंना ट्रायथलॉन A (६० मी. धावणे, लांब उडी, उंच उडी), ट्रायथलॉन B (६० मी. धावणे, लांब उडी, शॉट पुट १ किलो बॅक थ्रो) किंवा ट्रायथलॉन C (६० मी. धावणे, ६०० मी. धावणे) यापैकी कोणत्याही एका प्रकारात भाग घेता येईल. ट्रायथलॉनसाठी ₹२०० शुल्क आहे. याशिवाय, किड्स जॅव्हेलिन (भाला फेक) मध्ये भाग घेणे सर्वांसाठी अनिवार्य असून, त्यासाठी ₹१०० शुल्क आकारले जाईल.
१६ वर्षांखालील मुलांसाठी ६० मी. धावणे, ६०० मी. धावणे, गोळा फेक (स्टँडिंग थ्रो), थाळी फेक, भाला फेक (५०० ग्रॅम, १० मीटर रन ॲप्रोच), लांब उडी आणि उंच उडी (सीझर) यांसारखे इव्हेंट्स असतील. या गटातील प्रत्येक खेळाडू कोणत्याही दोन इव्हेंटमध्ये भाग घेऊ शकतो आणि प्रत्येक इव्हेंटसाठी ₹१०० शुल्क असेल.
स्पर्धेत भाग घेण्यासाठी ग्रामपंचायत, पंचायत समिती, नगर पालिका, किंवा महा नगर पालिका यांनी दिलेला मूळ जन्म दाखला सादर करणे आवश्यक आहे. या दाखल्याशिवाय स्पर्धेत सहभागी होता येणार नाही. स्पर्धेतील विजेत्यांना मेरिट सर्टिफिकेट आणि मेडल दिले जाईल. या स्पर्धेनंतर राज्य स्तरावरील स्पर्धा नाही, तर थेट राष्ट्रीय आंतर-जिल्हा ॲथलेटिक मीटसाठी निवड केली जाणार आहे. निवड समितीद्वारे शिबिरातून १३ जणांचा संघ निवडला जाईल.
सिंधुदुर्ग जिल्हा हौशी ॲथलेटिक असोसिएशनचे अध्यक्ष श्री. रणजित सिंग राणे, सचिव कल्पना तेंडुलकर, आयोजक सचिव बाळकृष्ण कदम आणि प्रमुख सल्लागार अजय शिंदे यांनी जिल्ह्यातील जास्तीत जास्त नवोदित खेळाडूंनी या संधीचा लाभ घ्यावा, असे आवाहन केले आहे.
