सोशल मीडियावरील ओळखीचे भयावह रूप
२४ तासांत पोलिसांची कारवाई, तपास सुरू
बेंगळुरूमधील ज्ञानज्योतीनगर परिसरात एका २१ वर्षीय तरुणीवर इन्स्टाग्रामवरून ओळख झालेल्या व्यक्तीने पाठलाग करून मारहाण केल्याची धक्कादायक घटना घडली आहे. पीजी निवासस्थानाबाहेरच तरुणीवर हल्ला करत आरोपीने तिचा विनयभंग करण्याचा प्रयत्न केल्याचा आरोप आहे. दीर्घकाळ मानसिक व शारीरिक छळ सहन केल्यानंतर पीडितेने अखेर पोलिसांत तक्रार दाखल केली. तक्रारीच्या आधारे पोलिसांनी गंभीर कलमान्वये गुन्हा दाखल करत आरोपीला अटक केली. सोशल मीडियावरील ओळखी किती धोकादायक ठरू शकतात, याचे हे प्रकरण जिवंत उदाहरण ठरत आहे.
बेंगळुरू : उल्लाल मेन रोडवरील ज्ञानज्योतीनगर भागात असलेल्या पेइंग गेस्ट (पीजी) निवासस्थानी राहणाऱ्या एका २१ वर्षीय महिलेवर सोमवारी (२२ डिसेंबर) दुपारी इन्स्टाग्रामवर ओळख झालेल्या व्यक्तीने पाठलाग करून मारहाण केल्याची गंभीर घटना घडली. पीडितेच्या तक्रारीनंतर ज्ञानभारती पोलिसांनी तातडीने कारवाई करत नवीन कुमार एन (२९), रा. बिल्लामारनहल्ली, येलहंका याला अटक केली.
पीडिता अर्चना (नाव बदलले आहे) ही मूळची चिक्कमगलुरु जिल्ह्यातील शृंगेरी येथील असून, ती गेल्या दोन वर्षांपासून बेंगळुरूमध्ये वास्तव्यास होती. ती एका विकासकाच्या फर्ममध्ये टेलि-कॉलर म्हणून काम करत होती. तिने पोलिसांत दिलेल्या तक्रारीनुसार, ही घटना दुपारी ३.२० ते ३.४० दरम्यान घडली.
तक्रारीत तिने नमूद केले की, ३० सप्टेंबर रोजी कामाच्या अनुषंगाने तिने इन्स्टाग्रामवर जाहिरात पोस्ट केली होती. ती पोस्ट पाहून नवीन कुमार याने प्रतिक्रिया दिली. काही दिवस चॅटिंग झाल्यानंतर दोघांमध्ये फोन नंबरची देवाणघेवाण झाली. त्यानंतर नवीनकडून सतत कॉल व मेसेज येऊ लागले आणि तो नागरभावी परिसरात तिला भेटू लागला.
पहिले तीन महिने वर्तन सौहार्दपूर्ण असले तरी नंतर आरोपीने प्रेमाचा प्रस्ताव स्वीकारण्यासाठी दबाव टाकण्यास सुरुवात केल्याचा आरोप पीडितेने केला आहे. आपणास रस नसल्याचे वारंवार सांगूनही तो पाठलाग, मानसिक छळ करत राहिला. ती जिथे जाईल तिथे तिच्या हालचालींवर नजर ठेवत असल्याचेही तिने तक्रारीत म्हटले आहे.
हा छळ सहन न झाल्याने तिने नोकरी सोडली आणि वेगळ्या पीजीमध्ये स्थलांतर केले. मात्र, तरीही आरोपीने पीजी परिसरात येऊन त्रास देणे सुरूच ठेवले. अनेक वेळा शाब्दिक अत्याचार आणि शारीरिक मारहाण केल्याचा आरोपही तिने केला आहे.
२२ डिसेंबर रोजी दुपारी सुमारे ३.२० वाजता ती आपल्या मित्रासोबत स्कूटरवरून बाहेर पडत असताना, आरोपीने कार आडवी लावून त्यांना अडवले. त्यानंतर डोक्यावर, पाठीवर व मानेवर वार करून तिच्यावर हल्ला केला. हल्ल्यादरम्यान कपडे फाडण्याचा प्रयत्न केल्याचाही गंभीर आरोप तिने केला आहे.
घटनेनंतर पीडितेने तात्काळ इमर्जन्सी हेल्पलाईन ११२ वर संपर्क साधला. पोलिस घटनास्थळी पोहोचेपर्यंत आरोपी फरार झाला होता. तक्रारीच्या आधारे पोलिसांनी भारतीय न्याय संहिता अंतर्गत कलम ७४, ७५, ७६, ७८, ७९ आणि ३५१ नुसार गुन्हा दाखल केला.
यानंतर पोलिसांनी २४ तासांच्या आत आरोपीला अटक केली. चौकशीत आरोपीने इन्स्टाग्रामवरून ओळख झाल्यानंतर दोघांमध्ये प्रेमसंबंध असल्याचा दावा केला. मात्र, पीडितेने नंबर व सोशल मीडिया ब्लॉक केल्यानंतर तो निराश व संतप्त झाला आणि रागाच्या भरात हल्ला केल्याची कबुली दिल्याचे एका वरिष्ठ पोलीस अधिकाऱ्यांनी सांगितले.
पोलिस उपायुक्त (दक्षिण-पश्चिम) अनिथा बी. हद्दन्नावर यांनी सांगितले की, प्रकरणाचा सखोल तपास सुरू असून आरोपीविरोधात ठोस पुरावे गोळा केले जात आहेत. महिलांच्या सुरक्षेबाबत पोलिसांकडून शून्य सहनशीलतेची भूमिका घेतली जाईल, असेही त्यांनी स्पष्ट केले.
