कळसूत्री बाहुल्या, वारकरी जागर आणि पारंपरिक फुगड्यांचे आकर्षण
ग्रंथदालनाचेही थाटात आयोजन
सावंतवाडी | प्रतिनिधी
महाराष्ट्र राज्य साहित्य संस्कृती मंडळ अनुदानित आणि श्रीराम वाचन मंदिर, सावंतवाडी आयोजित पहिल्या सिंधुदुर्ग जिल्हा साहित्य संमेलनाचा उत्साह शिगेला पोहोचला असून, संमेलनाच्या पहिल्याच दिवशी उद्या (शनिवारी) सायंकाळी कोकणी लोककलांचा अभूतपूर्व आविष्कार रसिकांना अनुभवायला मिळणार आहे. राणी पार्वतीदेवी (आरपीडी) हायस्कूलच्या प्रांगणात उभारलेल्या ‘केशवसूत साहित्य नगरीत’ हा सोहळा पार पडणार आहे.
लोककलांची मांदियाळी
शनिवार, दि. २७ रोजी सायंकाळी ५.३० वाजल्यापासून सांस्कृतिक कार्यक्रमांना सुरुवात होईल. यामध्ये स्थानिक कलाकारांच्या सादरीकरणावर विशेष भर देण्यात आला आहे. आरपीडी हायस्कूलच्या विद्यार्थ्यांचा ‘वारकरी जागर’ विठ्ठलनामाचा गजर करेल, तर आडवी गावच्या महिला पारंपरिक ‘फुगड्यां’चा फेर धरणार आहेत.
विशेष आकर्षण म्हणून पिंगुळी येथील नामवंत कलाकार एकनाथ गंगावणे यांच्या ‘कळसूत्री बाहुल्यांचा खेळ’ सादर होणार आहे. यामध्ये रामायण आणि सीता स्वयंवर यांसारखे पौराणिक प्रसंग जिवंत केले जातील. तसेच देवसू येथील महिलांचे सादरीकरण आणि कारिवडे येथील गणपत परब यांच्या लोकगीतांची मेजवानी रसिकांना मिळणार आहे.
ग्रंथप्रेमींसाठी पर्वणी
साहित्याचा हा उत्सव केवळ चर्चासत्रांपुरता मर्यादित न राहता वाचकांसाठी ज्ञानाचे भांडारही खुले करण्यात आले आहे. संमेलनात ‘कविवर्य आ. सो. शेवरे ग्रंथ दालन’ उभारण्यात आले असून, यात विविध नामांकित प्रकाशनांचे स्टॉल्स आहेत.
महाराष्ट्र शासन ग्रंथ भांडार (कोल्हापूर): साहित्य संस्कृती मंडळ प्रकाशित दुर्मिळ ग्रंथ.
विघ्नेश प्रकाशन (कणकवली): स्थानिक आणि प्रादेशिक साहित्य.
विचार ग्रंथ दालन (गोवा) व क्षितिज वितरण (सावंतवाडी): विविध विषयांवरील पुस्तके.
साहित्य रसिकांनी मोठ्या संख्येने उपस्थित राहून या सांस्कृतिक कार्यक्रमांचा आनंद घ्यावा आणि ग्रंथदालनाला भेट द्यावी, असे आवाहन आयोजन समितीच्या वतीने करण्यात आले आहे. कोकणी संस्कृती आणि साहित्याचा हा संगम अनुभवण्यासाठी सिंधुदुर्गवासीय उत्सुक आहेत.
