जीर्णोद्धारासाठी जिल्हा प्रशासनाचा निर्णय
महाशिवरात्री काळात (१२ ते १८ फेब्रुवारी) मंदिर राहणार खुले
पुणे जिल्ह्यातील प्रसिद्ध तीर्थक्षेत्र असलेले भीमाशंकर मंदिर ९ जानेवारीपासून पुढील तीन महिन्यांसाठी भाविकांच्या दर्शनासाठी बंद ठेवण्यात येणार आहे. मंदिराच्या जीर्णोद्धार व विकासकामांसाठी हा निर्णय घेण्यात आला असून, मात्र महाशिवरात्रीच्या काळात १२ ते १८ फेब्रुवारीदरम्यान मंदिर भाविकांसाठी खुले राहणार आहे.
पुणे : जिल्हाधिकारी जितेंद्र दुडी यांनी दिलेल्या अधिकृत निवेदनानुसार, २३ डिसेंबर रोजी जिल्हा प्रशासन, मंदिर विश्वस्त, स्थानिक दुकानदार आणि भीमाशंकर गावातील रहिवासी यांच्यात झालेल्या संयुक्त बैठकीत हा निर्णय घेण्यात आला.
भीमाशंकर मंदिर हे १२ पवित्र ज्योतिर्लिंगांपैकी एक असून महाराष्ट्रातील अत्यंत महत्त्वाचे तीर्थक्षेत्र आहे. मंदिराच्या विकास आराखड्यात नवीन असेंब्ली हॉलचे बांधकाम, प्रवेश व निर्गमन व्यवस्थेतील सुधारणा तसेच गर्दी नियंत्रणासाठी विशेष उपाययोजना यांचा समावेश आहे.
जिल्हाधिकारी कार्यालयातील एका अधिकाऱ्याने सांगितले की, २०२७ मध्ये नाशिक येथे होणाऱ्या कुंभमेळ्यापूर्वी हे सर्व काम पूर्ण करण्याचे उद्दिष्ट आहे. कुंभमेळ्याच्या काळात नाशिक आणि त्र्यंबकेश्वर येथे मोठ्या प्रमाणावर भाविक येणार असल्याने, भीमाशंकरलाही भाविकांची मोठी वर्दळ होण्याची शक्यता आहे.
मंदिर व्यवस्थापनाने स्पष्ट केले आहे की, मंदिर भाविकांसाठी बंद असले तरी सकाळची पूजा, अभिषेक आणि दैनंदिन धार्मिक विधी नेहमीप्रमाणे सुरू राहतील. मात्र, या कालावधीत थेट दर्शन व मंदिरात प्रवेश सर्वसामान्य भाविकांसाठी बंद राहणार आहे.
या काळात मंदिर परिसरात फक्त बांधकाम कर्मचारी, अधिकृत कर्मचारी आणि स्थानिक ग्रामस्थांनाच प्रवेश दिला जाईल. भाविकांच्या सुरक्षिततेच्या दृष्टीनेच हा निर्णय घेण्यात आल्याचे जिल्हाधिकारी दुडी यांनी सांगितले.
“सर्व भाविकांनी तसेच स्थानिक समुदायाने मंदिर व्यवस्थापन, जिल्हा प्रशासन, पोलीस आणि स्थानिक यंत्रणांना सहकार्य करावे,” असे आवाहनही त्यांनी केले.
राज्य पुरातत्व विभागाने यापूर्वीच मंदिरात होणाऱ्या मोठ्या गर्दीमुळे जीर्णोद्धाराचे काम करणे कठीण असल्याचे नमूद करत, कामाच्या काळात मंदिर बंद ठेवण्याची शिफारस केली होती, असेही सूत्रांनी सांगितले.
