बीसीसीआयच्या निर्देशानंतर केकेआरने घेतला निर्णय
आयपीएल करारातील तरतुदींवर पुन्हा प्रश्नचिन्ह
बांगलादेशचा वेगवान गोलंदाज मुस्तफिझूर रहमान याला कोलकाता नाईट रायडर्सकडून मुक्त केल्यानंतर कोणतीही आर्थिक भरपाई मिळण्याची शक्यता नाही.
मुस्तफिझूरच्या सुटकेमागे त्याची कोणतीही चूक नसतानाही विद्यमान आयपीएल करार नियमांमुळे तो नुकसानभरपाईपासून वंचित राहणार आहे.
बीसीसीआयच्या सूचनेनुसार केकेआरने हा निर्णय घेतल्याचे सांगण्यात येते.
या प्रकरणामुळे खेळाडूंच्या हक्कांवर आणि आयपीएल करारातील सुरक्षेवर चर्चा सुरू झाली आहे.
दरम्यान, या निर्णयाचे आंतरराष्ट्रीय क्रिकेटवरही परिणाम होताना दिसत आहेत.
नवी दिल्ली : इंडियन प्रीमियर लीग 2026 साठी कोलकाता नाईट रायडर्स संघाने मुस्तफिझूर रहमान याला 9.20 कोटी रुपयांना विकत घेतले होते. चेन्नई सुपर किंग्ज आणि दिल्ली कॅपिटल्स यांच्याशी स्पर्धात्मक बोलीनंतर केकेआरने त्याला संघात सामावून घेतले होते.
मात्र, नंतर भारतीय क्रिकेट नियामक मंडळाच्या (बीसीसीआय) सूचनेनुसार केकेआरने मुस्तफिझूरला मुक्त केले. या निर्णयामागील नेमकी कारणे स्पष्ट करण्यात आलेली नसून केवळ सर्वत्र घडामोडी असा उल्लेख करण्यात आला आहे.
या निर्णयाचे पडसाद आंतरराष्ट्रीय क्रिकेट क्षेत्रातही उमटले आहेत. बांगलादेश क्रिकेट बोर्डाने (BCB) भारतात होणारे T20 विश्वचषक सामने भारताबाहेर हलवून श्रीलंकेत घेण्याची मागणी केली आहे. यामुळे दोन्ही क्रिकेट मंडळांमधील तणाव वाढल्याचे चित्र आहे.
सूत्रांच्या माहितीनुसार, आयपीएल खेळाडूंच्या पगारावर विमा संरक्षण असते. परदेशी खेळाडूंना स्पर्धेदरम्यान दुखापत झाल्यास विम्याअंतर्गत काही प्रमाणात रक्कम दिली जाते. मात्र मुस्तफिझूरची सुटका दुखापत किंवा शिस्तभंगाशी संबंधित नसल्याने त्याचे प्रकरण या विमा तरतुदींमध्ये बसत नाही.
एका आयपीएल सूत्राने सांगितले की, या परिस्थितीत केकेआरवर कोणतीही आर्थिक भरपाई देण्याचे बंधन नाही. कायदेशीर मार्ग खुला असला तरी परदेशी खेळाडू सहसा अशा प्रक्रियेत पडत नाहीत. त्यामुळे मोठ्या रकमेचा करार असूनही मुस्तफिझूर रहमान रिकाम्या हाताने आयपीएलमधून बाहेर पडण्याची शक्यता आहे.
