उलटी-जुलाबाच्या उद्रेकाने इंदूर हादरले
भगीरथपुरा भागात मृतांच्या आकड्यावर मतभेद
मध्य प्रदेशातील इंदूर शहरात पाणी दूषित झाल्यामुळे उलटी आणि जुलाबाच्या तीव्र उद्रेकाने नागरिकांमध्ये भीतीचे वातावरण निर्माण झाले आहे. या पार्श्वभूमीवर लोकसभेतील विरोधी पक्षनेते राहुल गांधी यांनी बाधित रुग्ण आणि मृतांच्या कुटुंबीयांची भेट घेत परिस्थितीची प्रत्यक्ष पाहणी केली. बॉम्बे हॉस्पिटलमध्ये उपचार घेत असलेल्या रुग्णांची चौकशी करून त्यांनी कुटुंबीयांना दिलासा दिला. भगीरथपुरा परिसरातही त्यांनी भेट देत शोक व्यक्त केला. मृतांच्या संख्येबाबत रहिवासी, प्रशासन आणि वैद्यकीय समिती यांच्यात वेगवेगळे दावे समोर आले आहेत.
इंदूर : काँग्रेस नेते राहुल गांधी यांनी शनिवारी (17 जानेवारी 2026) इंदूर शहरातील पाणी दूषित प्रकरणामुळे उलटी आणि जुलाबाच्या प्रादुर्भावाने बाधित झालेल्या रुग्ण व त्यांच्या कुटुंबीयांची भेट घेतली. बॉम्बे हॉस्पिटलमध्ये उपचार घेत असलेल्या चार रुग्णांची त्यांनी प्रकृती विचारपूस केली आणि त्यांच्या नातेवाईकांशी संवाद साधला.
या वेळी मध्य प्रदेश काँग्रेसचे अध्यक्ष जितू पटवारी आणि पक्षनेते उमंग सिंघार राहुल गांधी यांच्यासोबत उपस्थित होते. त्यानंतर गांधी यांनी भगीरथपुरा भागालाही भेट दिली. गेल्या महिन्यात येथे झालेल्या उद्रेकात मृत्यू झालेल्या नागरिकांच्या कुटुंबीयांशी त्यांनी संवाद साधत शोक व्यक्त केला आणि सांत्वन केले.
राहुल गांधींच्या दौऱ्यापूर्वी भगीरथपुरा परिसरात कडक पोलीस बंदोबस्त तैनात करण्यात आला होता. अनेक ठिकाणी बॅरिकेड्स लावून सुरक्षेची खबरदारी घेण्यात आली होती.
भगीरथपुरा येथील रहिवाशांचा दावा आहे की उलटी-जुलाबाच्या उद्रेकात आतापर्यंत 24 जणांचा मृत्यू झाला आहे. मात्र, राज्य सरकारने मध्य प्रदेश उच्च न्यायालयात सादर केलेल्या अहवालानुसार पाच महिन्यांच्या अर्भकासह सात जणांचा मृत्यू झाल्याचे नमूद करण्यात आले आहे.
दरम्यान, महात्मा गांधी मेमोरियल मेडिकल कॉलेजच्या समितीने तयार केलेल्या ‘डेथ ऑडिट’ अहवालात भगीरथपुरामधील 15 मृत्यूंचा या उद्रेकाशी काही प्रमाणात संबंध असल्याचे सूचित करण्यात आले आहे. उद्रेक सुरू झाल्यानंतर मृत्यू झालेल्या 21 नागरिकांच्या कुटुंबीयांना प्रत्येकी 2 लाख रुपयांची आर्थिक मदत प्रशासनाकडून देण्यात आली आहे.
अधिकाऱ्यांनी स्पष्ट केले की, काही मृत्यू इतर आजारांमुळे झाले असले तरी मानवतावादी दृष्टिकोनातून सर्व शोकग्रस्त कुटुंबांना आर्थिक मदत देण्यात आली आहे.
