पुणे शहर, ग्रामीण आणि पिंपरी चिंचवडमध्ये अखंड संप्रेषण व्यवस्था
डोंगराळ भागातही रिअल-टाइम संपर्क शक्य
पुणे ग्रँड टूरदरम्यान सहभागी संघ, पोलिस यंत्रणा आणि जिल्हा प्रशासन यांच्यात अखंड समन्वय राखण्यासाठी पुणे पोलिसांनी अत्याधुनिक वॉकी-टॉकी संप्रेषण प्रणाली कार्यान्वित केली आहे. या उपक्रमासाठी स्वतंत्र संप्रेषण चॅनेल सुरू करण्यात आले असून त्यामुळे कार्यक्रमाचे व्यवस्थापन अधिक कार्यक्षम झाले आहे. शहर, ग्रामीण आणि पिंपरी चिंचवड भागात ही प्रणाली एकाच वेळी सक्रिय ठेवण्यात आली आहे. मोबाईल नेटवर्क अडचणीच्या भागातही संपर्क तुटू नये, यासाठी ही व्यवस्था उपयुक्त ठरत आहे. सहभागी संघ, सायकलस्वार आणि पोलिसांना तात्काळ माहिती व मदत मिळत आहे.
पुणे : पुणे ग्रँड टूरमध्ये सहभागी होणाऱ्या विविध संघांमध्ये तसेच पोलिस आणि जिल्हा प्रशासन यांच्यात अखंड समन्वय राखण्यासाठी पुणे पोलिसांनी आधुनिक वॉकी-टॉकी संप्रेषण प्रणाली कार्यान्वित केली आहे.
पुणे शहर, पुणे ग्रामीण आणि पिंपरी चिंचवड या दौऱ्याचे आयोजन करणाऱ्या भागांमध्ये एक समर्पित संप्रेषण चॅनेल सक्रिय करण्यात आले असून, त्यामुळे आतापर्यंत कार्यक्रमाचे व्यवस्थापन अधिक प्रभावी झाल्याचे पोलिसांकडून सांगण्यात आले.
पोलिस आयुक्त अमितेश कुमार यांच्या नेतृत्वाखाली अल्ट्रा हाय फ्रिक्वेन्सी (UHF), व्हेरी हाय फ्रिक्वेन्सी (VHF) आणि ॲनालॉग कम्युनिकेशन सिस्टीम एकत्रित करण्यात आली आहे.
सहाय्यक पोलिस आयुक्त (संवाद व आयटी) विवेक पवार यांनी प्रहार डिजिटलला सांगितले की, “एकात्मिक संप्रेषण प्रणाली सुरू केल्यानंतर आम्ही संघ व्यवस्थापकांना वॉकी-टॉकी वितरित केल्या असून, पोलिस व्हॅन आणि मोटरसायकल्सवर GPS ट्रॅकर बसवण्यात आले आहेत. यामुळे संघ व्यवस्थापकांना त्यांच्या सदस्यांशी तसेच सायकलस्वारांशी थेट संवाद साधता येत आहे.”
या व्यवस्थेंतर्गत 110 वॉकी-टॉकी सेट, 56 वाहने GPS ट्रॅकरसह सुसज्ज करण्यात आली असून, जमिनीवरील व्यवस्थापन आणि रिअल-टाइम अपडेटसाठी 80 वायरलेस सेट अधिकारी व कर्मचाऱ्यांना देण्यात आले आहेत.
पुणे जिल्ह्यातील घाट, डोंगर आणि दऱ्यांमुळे अनेक ठिकाणी मोबाईल नेटवर्क कमकुवत किंवा अनुपलब्ध असते. “नवीन प्रणालीमुळे संघ, सायकलस्वार आणि पोलिस कर्मचारी डोंगराळ व ग्रामीण भागातही सतत जोडलेले राहू शकत आहेत. यामुळे वेळेवर मदत, मार्गदर्शन आणि सुरक्षितता सुनिश्चित होत आहे,” असे पवार यांनी स्पष्ट केले.
