दक्षिण सुलावेसीतील माउंट बुलुसारंग परिसरात शोधमोहीम पूर्ण; ब्लॅक बॉक्स तपासणी सुरू
इंडोनेशियाच्या दक्षिण सुलावेसी प्रांतात बेपत्ता झालेल्या मत्स्यपालन पाळत ठेवणाऱ्या विमानातील सर्व 10 प्रवाशांचे मृतदेह सापडल्याची माहिती देशाच्या शोध व बचाव संस्थेने शुक्रवारी (23 जानेवारी 2026) दिली.
जकार्ता / दक्षिण सुलावेसी : एव्हिएशन ग्रुप इंडोनेशिया एअर ट्रान्सपोर्ट (IAT)च्या मालकीचे ATR 42-500 टर्बोप्रॉप विमान शनिवारी (17 जानेवारी 2026) दुपारी 1.30 वाजता दक्षिण सुलावेसीतील मारोस प्रदेशावरून उड्डाण करत असताना हवाई वाहतूक नियंत्रणाशी संपर्क तुटला होता.
या विमानात सात क्रू सदस्य आणि तीन प्रवासी होते. हे प्रवासी इंडोनेशियाच्या सागरी व्यवहार व मत्स्यव्यवसाय मंत्रालयाचे कर्मचारी होते आणि मत्स्यपालन क्षेत्राचे हवाई निरीक्षण करण्यासाठी हे विमान चार्टर करण्यात आले होते.
दक्षिण सुलावेसी बचाव एजन्सीचे अधिकारी अँडी सुलतान यांनी सांगितले की, शुक्रवारी सकाळी नववे आणि दहावे मृतदेह सापडले. भावुक होत त्यांनी सांगितले की, मृतदेह बाहेर काढण्याची (evacuation) प्रक्रिया अद्याप सुरू आहे.
डोंगराळ भागात मलबा सापडला
याआधी बचाव पथकांना माउंट बुलुसारंग परिसरात वेगवेगळ्या ठिकाणी विमानाचा मलबा सापडला होता. हा भाग राजधानी जकार्तापासून सुमारे 1,500 किमी ईशान्येस आहे.
ब्लॅक बॉक्स तपासणी सुरू
इंडोनेशियाची नॅशनल ट्रान्सपोर्टेशन सेफ्टी कमिटी (KNKT) या अपघाताची चौकशी करत असून, नुकताच सापडलेला ब्लॅक बॉक्स तपासला जात आहे, अशी माहिती अधिकाऱ्यांनी दिली.
ATR 42 विमानाचा दशकातील पहिला प्राणघातक अपघात
फ्रँको-इटालियन कंपनी ATR निर्मित ATR 42 विमानाचा इंडोनेशियातील हा दहा वर्षांतील पहिला प्राणघातक अपघात आहे. याआधी 2015 मध्ये पापुआ प्रदेशात त्रिगाना एअर सर्व्हिसचे ATR 42-300 विमान कोसळले होते, ज्यात 54 जणांचा मृत्यू झाला होता.
तसेच, 2021 मध्ये श्रीविजया एअरचे बोईंग 737-500 विमान जावा समुद्रात कोसळून 62 प्रवाशांचा मृत्यू झाला होता.
