DPBI, NIA आणि दिल्ली पोलिसांचे नाव घेऊन व्हिडिओ कॉलवर दबाव
नऊ खात्यांत रक्कम ट्रान्सफर; निवृत्ती लाभ आणि एफडी मोडून पैसे भरले
पुण्यातील एरंडवणे येथे राहणाऱ्या 70 वर्षीय निवृत्त सरकारी अधिकाऱ्याला अटकेची धमकी देत सायबर भामट्यांनी 2.02 कोटी रुपयांची फसवणूक केल्याचा धक्कादायक प्रकार समोर आला आहे. डेटा प्रोटेक्शन बोर्ड ऑफ इंडिया आणि राष्ट्रीय तपास यंत्रणेचे अधिकारी असल्याचे भासवून आरोपींनी भीती निर्माण केली. मनी लॉन्ड्रिंग आणि PFI संबंधी खोटे आरोप करत वारंवार व्हिडिओ कॉलद्वारे दबाव टाकण्यात आला. पीडितेकडून त्याचे आणि पत्नीचे बँक तपशील उघड करून घेत नऊ वेगवेगळ्या खात्यांत रक्कम वर्ग करण्यात आली. निवृत्तीचे सर्व लाभ आणि मुदत ठेवी मोडून ही रक्कम भरावी लागल्याची माहिती पोलिसांनी दिली.
पुणे : एरंडवणे परिसरातील ७० वर्षीय निवृत्त महाराष्ट्र सरकारी अधिकारी यांनी सायबर क्राइम पोलिसांकडे तक्रार दाखल करत १३ जानेवारी ते ४ फेब्रुवारीदरम्यान 2.02 कोटी रुपयांची फसवणूक झाल्याचे सांगितले. आरोपींनी मनी लॉन्ड्रिंग प्रकरणात अटक करण्याची धमकी देत ही रक्कम उकळली.
पोलिसांच्या माहितीनुसार, भामट्यांनी डेटा प्रोटेक्शन बोर्ड ऑफ इंडिया (DPBI) चे अधिकारी असल्याचे भासवले आणि पीडितेवर बंदी घातलेल्या पॉप्युलर फ्रंट ऑफ इंडिया (PFI) सदस्यांशी संपर्क केल्याचा खोटा आरोप केला. त्याच्या मोबाईल क्रमांकाचा वापर करून 1.5 कोटी रुपयांची फसवणूक करण्यात आल्याचा दावा करत त्याला दहशतवादी कारवायांशी संबंध असल्याचे सांगितले.
सायबर क्राइम विभागाच्या वरिष्ठ निरीक्षक स्वप्नाली शिंदे यांनी सांगितले की, संशयितांनी स्वतःला DPBI, नॅशनल इन्व्हेस्टिगेशन एजन्सी (NIA) आणि दिल्ली पोलिसांचे अधिकारी म्हणून सादर करत वारंवार व्हिडिओ कॉलद्वारे अटकेची धमकी दिली. दीड कोटी रुपयांच्या व्यवहाराचा हवाला देत त्यांनी पीडितेकडून त्याच्या दोन बँक खात्यांचे तपशील उघड करून घेतले.
भामट्यांनी त्याच्या पत्नीचीही चौकशी करत पत्नीच्या बँक खात्याची माहिती मागवली. एफआयआरनुसार, हे प्रकरण सर्वोच्च न्यायालयात प्रलंबित असून कधीही अटक होऊ शकते, असा खोटा दावा करून भीती निर्माण करण्यात आली. तसेच पैसे दिल्यास प्रकरण दडपण्याचा अधिकार असल्याचे सांगून त्याची दिशाभूल करण्यात आली.
यानंतर पीडितेने त्याच्या आणि पत्नीच्या खात्यांतून आरोपींनी दिलेल्या नऊ वेगवेगळ्या बँक खात्यांमध्ये 2.02 कोटी रुपये ट्रान्सफर केले. ही रक्कम भरण्यासाठी त्याने निवृत्तीचे सर्व लाभ खर्च केले तसेच मुदत ठेवी मोडल्या, असे पोलिसांनी नमूद केले. प्रकरणाचा पुढील तपास सुरू आहे.
