सिंधुदुर्ग शिक्षण प्रसारक मंडळ अभियांत्रिकीच्या अंतिम वर्षाच्या परीक्षेत विद्यार्थ्यांनी उल्लेखनीय कामगिरी करत महाविद्यालयाची उज्ज्वल शैक्षणिक परंपरा कायम राखली आहे. या परीक्षेत विद्यार्थ्यांनी उत्कृष्ट गुण मिळवत महाविद्यालयाच्या नावलौकिकात भर घातली आहे.
मंडळाच्या अभियांत्रिकी महाविद्यालयाच्या कृत्रिम बुद्धिमत्ता आणि मशीन लर्निंग अभियांत्रिकी विभागाच्या अंतिम वर्ष (बीई 25_26) परीक्षेचा निकाल नुकताच जाहीर झाला आहे. कृत्रिम बुद्धिमत्ता आणि मशीन लर्निंग विभागातून चौथ्या वर्षाच्या सातव्या सत्रासाठी 100 टक्के निकाल लागला आहे.
या परीक्षेत कुमारी प्राची बांदेकर (जाणवली, कणकवली) यांनी 9.73 SGPI गुणांसह प्रथम क्रमांक पटकावून आपली गुणवत्ता सिद्ध केली आहे. त्यांच्या या यशामुळे त्यांनी महाविद्यालयात अव्वल स्थान पटकावले आहे. तसेच कुमारी तन्मया होडावडेकर (आडेली, वेंगुर्ला) यांनी 9.45 SGPI गुण मिळवत द्वितीय क्रमांक प्राप्त केला असून त्यांनीही उत्कृष्ट कामगिरी करून सर्वांचे लक्ष वेधले आहे. तर कुमार आदित्य कालोजी (निरवडे, सावंतवाडी) यांनी 9.18 SGPI गुणांसह तृतीय क्रमांक पटकावत महाविद्यालयाच्या शिरपेचात मानाचा तुरा रोवला आहे.
या तिन्ही विद्यार्थ्यांनी आपल्या यशाचे श्रेय महाविद्यालयातील उत्कृष्ट शैक्षणिक वातावरण, अनुभवी प्राध्यापकांचे मार्गदर्शन आणि स्वतःच्या सातत्यपूर्ण परिश्रमांना दिले आहे. नियमित अभ्यास, शिस्तबद्ध जीवनशैली आणि वेळेचे योग्य नियोजन यामुळेच हे यश शक्य झाले असल्याचे त्यांनी नमूद केले.
या उज्ज्वल यशाबद्दल महाविद्यालयाचे प्राचार्य डॉ. डी. एस. बाडकर यांनी विद्यार्थ्यांचे अभिनंदन करत त्यांच्या पुढील वाटचालीसाठी शुभेच्छा दिल्या. तसेच कृत्रिम बुद्धिमत्ता आणि मशीन लर्निंग अभियांत्रिकी विभागाच्या विभागप्रमुख प्रा. प्राजक्ता राणे यांनी विद्यार्थ्यांच्या सातत्यपूर्ण मेहनतीचे कौतुक करत भविष्यात ते अधिक मोठे यश संपादन करतील, असा विश्वास व्यक्त केला.
याशिवाय संस्थेतील सर्व प्राध्यापक, कर्मचारी व सहाध्यायींनीही या गुणवंत विद्यार्थ्यांचे अभिनंदन करत त्यांच्या पुढील शैक्षणिक व व्यावसायिक कारकिर्दीसाठी शुभेच्छा दिल्या आहेत. या यशामुळे महाविद्यालयाचा शैक्षणिक दर्जा अधिक उंचावला असून भावी विद्यार्थ्यांसाठी हे एक प्रेरणादायी उदाहरण ठरले आहे.
या उज्वल यशाबद्दल महाविद्यालयाचे प्राचार्य डॉक्टर डी एस बाडकर आणि कृत्रिम बुद्धिमत्ता आणि मशीन लर्निंग अभियांत्रिकी विभाग प्रमुख प्राध्यापक प्राजक्ता राणे व सर्व कर्मचाऱ्यांतर्फे विद्यार्थ्यांचे अभिनंदन केले आहे. या यशस्वी विद्यार्थ्यांचे मंडळाचे अध्यक्ष सौ निलमताई राणे, उपाध्यक्ष आमदार निलेश जी राणे, सचिव नामदार नितेश जी राणे, संस्थापक नारायणराव जी राणे, प्राचार्य डी एस बाडकर, सर्व विभाग प्रमुख, शिक्षक व शिक्षकेतर कर्मचाऱ्यां कडून अभिनंदनाचा वर्षाव होत असून त्यांच्या भावी उज्वल वाटचालीसाठी शुभेच्छा देण्यात येत आहे.
