कणकवली :कणकवली उपजिल्हा रुग्णालय येथे वैद्यकीय अधीक्षक म्हणून डॉ. नीलिमा इनामदार यांनी नुकताच पदभार स्वीकारला आहे. त्यांच्या नियुक्तीमुळे रुग्णालयाच्या वैद्यकीय सेवांना नवे बळ मिळणार असल्याची अपेक्षा व्यक्त केली जात आहे. पदभार स्वीकारल्यानंतर डॉ. इनामदार यांनी रुग्णालयातील विविध विभागांची पाहणी केली तसेच डॉक्टर, परिचारिका व कर्मचाऱ्यांशी संवाद साधून उपलब्ध सुविधा, मनुष्यबळ आणि रुग्णसेवेबाबत माहिती घेतली. रुग्णांना दर्जेदार व तत्पर आरोग्यसेवा देणे हे आपले प्रमुख उद्दिष्ट असल्याचे त्यांनी यावेळी सांगितले.
रुग्णालयातील स्वच्छता, वेळेवर उपचार, औषधांचा पुरवठा आणि रुग्णांशी संवेदनशील वागणूक यावर विशेष भर देणार असल्याचेही त्यांनी स्पष्ट केले. नागरिकांनी शासकीय आरोग्यसेवेचा अधिकाधिक लाभ घ्यावा, असे आवाहनही त्यांनी केले.
डॉ. नीलिमा इनामदार यांच्या पदभार स्वीकृतीमुळे कणकवली तालुक्यातील आरोग्यसेवा अधिक सक्षम आणि परिणामकारक होईल, असा विश्वास व्यक्त केला जात आहे.
