रत्नागिरी जिल्ह्यात श्री सदस्यांचे श्रमदान; अनेक टन कचरा संकलित, शासकीय कार्यालये आणि सार्वजनिक परिसर चकाकला
राजापूर /दापोली: ज्येष्ठ निरूपणकार डॉ. नानासाहेब धर्माधिकारी यांच्या जन्मदिनाचे औचित्य साधून डॉ. श्री. नानासाहेब धर्माधिकारी प्रतिष्ठानच्या वतीने रविवार, १ मार्च २०२६ रोजी राजापूर आणि दापोली शहरात भव्य ‘महास्वच्छता अभियान’ राबविण्यात आले. प्रतिष्ठानचे अध्यक्ष पद्मश्री डॉ. आप्पासाहेब धर्माधिकारी आणि डॉ. सचिन धर्माधिकारी यांच्या मार्गदर्शनाखाली हजारो श्री सदस्यांनी या मोहिमेत सहभाग घेत स्वच्छतेचा आदर्श घालून दिला.
राजापूर: ६५ टन कचरा संकलित, ८०० सदस्यांचा सहभाग
राजापूर शहरात सुमारे ८०० श्री सदस्यांच्या सहभागातून १३ विविध ठिकाणी स्वच्छता करण्यात आली. या मोहिमेत २४.५ किमी लांबीचे रस्ते आणि ६६०० चौरस मीटर परिसराची स्वच्छता करून तब्बल ६५ टन कचरा गोळा करण्यात आला.
-
जवाहर चौक पिकअप शेड, मुख्य शौचालय, मुतारी, गणेश घाट आणि लक्ष्मी नारायण मंदिर परिसरातील तळीतून ५ ते ६ टन चिखल उपसण्यात आला. तसेच कोंडेतड येथील तळी आणि विविध धार्मिक चव्हाटे स्वच्छ करण्यात आले.
-
अभियानाची सांगता गणेश घाट येथे झाली. यावेळी नगराध्यक्ष ॲड. हुस्नबानू खलीफे यांनी प्रतिष्ठानच्या कार्याचे कौतुक केले व नगरपालिकेच्या १५० व्या वर्षानिमित्त सहकार्याची अपेक्षा व्यक्त केली. यावेळी प्रतिष्ठानचे सुरेश बाईत गुरुजी, नगरसेवक सौरभ खडपे, ॲड. जमीर खलीफे व अन्य पदाधिकारी उपस्थित होते. जमीर खलीफे यांनी प्रत्येक प्रभागात ‘स्वच्छता दूत’ नेमण्याचा प्रस्तावही मांडला.
दापोली: शासकीय कार्यालय परिसर चकाकला
दापोली शहरातही अत्यंत शिस्तबद्ध पद्धतीने हे अभियान राबवण्यात आले. पहाटेपासूनच श्री सदस्यांनी हातात झाडू आणि फावडे घेऊन शासकीय परिसराचे रूप पालटले.
-
उपविभागीय कार्यालय परिसर, तहसील कार्यालय, पंचायत समिती कार्यालय आणि भूमी अभिलेख कार्यालय परिसरात व्यापक स्वच्छता करण्यात आली.
-
सदस्यांनी परिसरातील झुडपे काढली आणि प्लास्टिक कचऱ्याची शास्त्रोक्त विल्हेवाट लावली. काही तासांच्या परिश्रमानंतर संपूर्ण शासकीय परिसर स्वच्छ व सुशोभित झाला. स्थानिक नागरिकांनी प्रतिष्ठानच्या या सामाजिक बांधिलकीचे विशेष कौतुक केले.
सामाजिक कार्याचा वारसा
डॉ. श्री नानासाहेब धर्माधिकारी प्रतिष्ठान हे केवळ स्वच्छतेसाठीच नव्हे, तर समाज प्रबोधन, व्यसनमुक्ती, वृक्षारोपण आणि आरोग्य शिबिरांच्या माध्यमातून समाजात मोठे परिवर्तन घडवत आहे. दासबोध निरूपणाच्या माध्यमातून लोकांमध्ये नैतिक मूल्ये रुजवण्याचे काम प्रतिष्ठान सातत्याने करत आहे. आजच्या या महास्वच्छता अभियानाने संपूर्ण रत्नागिरी जिल्ह्यात स्वच्छतेचा नवा संदेश पोहोचला आहे.
