यूएईमध्ये अडकला मुलगा; वडिलांचा हृदयविकाराने मृत्यू
उड्डाणे बंद; परतीबाबत अनिश्चितता कायम
पश्चिम आशियात सुरू असलेल्या संघर्षामुळे अनेक भारतीय नागरिक परदेशात अडकले आहेत. सातारा जिल्ह्यातील २५ वर्षीय पंकज फडतरे यांच्यासाठी ही परिस्थिती वैयक्तिक शोकांतिका ठरली. यूएईमध्ये कामानिमित्त असताना त्यांच्या वडिलांचे हृदयविकाराने निधन झाले, मात्र उड्डाणे बंद असल्याने त्यांना घरी परतता आले नाही. कुटुंबीयांना मुलाविनाच अंत्यसंस्कार करावे लागले. परतीच्या उड्डाणांबाबत अद्यापही अनिश्चितता कायम आहे.
पुणे : पश्चिम आशियातील सुरू असलेल्या संघर्षामुळे हजारो भारतीय नागरिक विविध देशांमध्ये अडकले असताना, सातारा जिल्ह्यातील दौलतनगर येथील २५ वर्षीय पंकज फडतरे यांच्यावर वैयक्तिक दु:खाचा डोंगर कोसळला. एका शिपिंग कंपनीत सीमन म्हणून कार्यरत असलेले पंकज संघर्ष सुरू झाला तेव्हा यूएईमधील फुजैराह शहरात कामासाठी होते. दरम्यान, सोमवारी त्यांच्या ५६ वर्षीय वडील दिपक फडतरे यांचे अचानक हृदयविकाराच्या झटक्याने निधन झाले.
वडिलांच्या निधनाची बातमी समजल्यानंतर पंकज यांनी घरी परतण्यासाठी उड्डाण मिळवण्याचे सर्वतोपरी प्रयत्न केले. मात्र वाढत्या तणावामुळे विमान सेवा निलंबित करण्यात आल्याने त्यांना भारतात परतता आले नाही. परिणामी, कुटुंबीयांना मुलाविनाच अंत्यसंस्कार करावे लागले.
पंकजचे चुलत भाऊ रमाकांत फडतरे यांनी सांगितले की, परतीच्या उड्डाणांबाबत कोणतीही स्पष्ट माहिती मिळत नाही. “पंकज हा कुटुंबातील एकुलता एक मुलगा आहे. अशा वेळी त्याची उपस्थिती आवश्यक होती. मात्र संघर्षामुळे तो यूएईमध्येच अडकून आहे. तो नेमका कधी परत येईल हेही स्पष्ट नाही. किमान उर्वरित विधींसाठी तरी तो लवकर यावा, अशी आमची अपेक्षा आहे,” असे त्यांनी नमूद केले.
कुटुंबीयांनी जिल्हा आणि राज्य प्रशासनाशी सतत संपर्क ठेवला असून पंकजच्या परतीसाठी प्रयत्न सुरू आहेत. पंकज गेली चार ते पाच वर्षे मुंबईतील एका फर्ममध्ये कार्यरत असून कामानिमित्त तो वारंवार परदेश दौरे करतो. “तो साधारण चार ते सहा महिन्यांतून एकदा घरी येतो. यावेळीही तो काही दिवसांत परतणार होता, मात्र अचानक वडिलांचे निधन झाले,” असे रमाकांत यांनी सांगितले.
