कमी दराचे आमिष दाखवून सायबर गुन्हा
ऑनलाइन व्यवहारात सतर्क राहण्याचे आवाहन
पुण्यातील विश्रांतवाडी परिसरात सायबर फसवणुकीचा प्रकार उघड झाला आहे. एका शिक्षिकेला स्टील पुरवठ्याच्या नावाखाली 4.50 लाख रुपयांना गंडा घालण्यात आला. कमी दराचे आमिष दाखवून आरोपींनी आगाऊ पैसे उकळले. नंतर संशय आल्यावर महिलेने चौकशी केली असता फसवणूक उघडकीस आली. या प्रकरणी पोलिसांनी गुन्हा दाखल करून तपास सुरू केला आहे.
पुणे : विश्रांतवाडी परिसरातील 46 वर्षीय शिक्षिकेची सायबर चोरट्यांनी 4.50 लाख रुपयांची फसवणूक केल्याचा प्रकार समोर आला आहे. घर बांधण्यासाठी स्टील पुरवण्याच्या बहाण्याने आरोपींनी ही फसवणूक केली.
पीडित महिलेने या प्रकरणी ऑनलाइन तक्रार दाखल केली होती. प्राथमिक तपासानंतर विश्रांतवाडी पोलिस ठाण्यात गुन्हा नोंद करण्यात आला असून पुढील तपास सुरू आहे.
पोलिसांनी दिलेल्या माहितीनुसार, संबंधित महिला तिच्या नवीन घरासाठी स्टील खरेदी करण्याच्या तयारीत होती. त्यावेळी तिला जालना येथील कथित पुरवठादार ऑनलाइन सापडला आणि तिने दिलेल्या मोबाईल क्रमांकावर संपर्क साधला.
कमी दरात स्टील देण्याचे आमिष दाखवत आरोपींनी तिला आगाऊ पैसे भरण्यास प्रवृत्त केले. त्यानुसार महिलेने पैसे भरले. त्यानंतर दुसऱ्या दिवशी आरोपीने मोठ्या ऑर्डरची मागणी करत डिलिव्हरीला विलंब होईल असे कारण दिले.
दरम्यान महिलेच्या मनात संशय निर्माण झाला आणि तिने संबंधित स्टील कंपनीशी थेट संपर्क साधला. तेव्हा कंपनीने त्यांच्याकडे कोणतीही ऑनलाइन विक्री सेवा नसल्याचे स्पष्ट केले.
यामुळे आपली फसवणूक झाल्याचे लक्षात येताच महिलेने तातडीने पोलिसांकडे धाव घेतली. सध्या या प्रकरणाचा सखोल तपास सुरू असून आरोपींचा शोध घेतला जात आहे.
