राज्यभर केंद्रीकृत ऑनलाइन प्रवेश प्रक्रिया
अर्ज दोन टप्प्यांत; पहिला भाग आजपासून उपलब्ध
पुण्यासह राज्यभरातील प्रथम वर्ष कनिष्ठ महाविद्यालय प्रवेश प्रक्रिया 10 एप्रिलपासून सुरू होत आहे. माध्यमिक शिक्षण संचालनालयाकडून यंदाही केंद्रीकृत ऑनलाइन पद्धतीने प्रवेश दिला जाणार आहे. विद्यार्थ्यांना अधिकृत पोर्टलवर जाऊन अर्जाचा पहिला भाग भरता येणार आहे. दहावीच्या निकालानंतर अर्जाचा दुसरा भाग सुरू केला जाईल. प्रवेश प्रक्रिया पूर्णपणे गुणवत्तेवर आधारित आणि पारदर्शक असणार आहे.
पुणे : प्रथम वर्ष कनिष्ठ महाविद्यालय (एफवायजेसी, इयत्ता अकरावी) प्रवेशासाठी ऑनलाइन प्रक्रिया 10 एप्रिलपासून सुरू होत आहे. माध्यमिक शिक्षण संचालनालय यंदाही राज्यभरातील सर्व कनिष्ठ महाविद्यालयांसाठी केंद्रीकृत प्रवेश प्रक्रिया राबवणार आहे. विद्यार्थ्यांना अधिकृत पोर्टलवर जाऊन अर्ज करता येणार आहे.
अर्ज प्रक्रिया दोन भागांत विभागण्यात आली आहे. पहिल्या भागात विद्यार्थ्यांची वैयक्तिक माहिती भरावी लागणार असून 10 एप्रिल रोजी सकाळी 10 वाजल्यापासून हा भाग उपलब्ध झाला आहे. दहावी (एसएससी) निकाल जाहीर झाल्यानंतर अर्जाचा दुसरा भाग सुरू केला जाईल, अशी माहिती राज्य माध्यमिक शिक्षण विभागाचे संचालक महेश पालकर यांनी दिली.
गेल्या वर्षाप्रमाणेच यंदाही प्रवेश प्रक्रिया पूर्णपणे ऑनलाइन आणि गुणवत्तेवर आधारित असेल. शेवटच्या विद्यार्थ्याला प्रवेश मिळेपर्यंत प्रक्रिया सुरू राहणार असून गरज भासल्यास अतिरिक्त प्रवेश फेऱ्याही घेण्यात येणार आहेत. सध्या दहावीच्या उत्तरपत्रिकांचे मूल्यांकन सुरू असल्याची माहिती देण्यात आली.
विद्यार्थी अधिकृत पोर्टलद्वारे अर्ज भरू शकतात तसेच प्रवेश प्रक्रियेसंदर्भात कोणतीही अडचण आल्यास हेल्पलाइन क्रमांक 8530955564 वर संपर्क साधता येणार आहे. विद्यार्थ्यांनी वेळेत अर्ज पूर्ण करण्याचे आवाहन करण्यात आले आहे.
