-10°C तापमानात कठीण ट्रेक पूर्ण; सहा दिव्यांग ट्रेकर्सचा सहभाग
अपघातानंतरही हार न मानता स्वप्न साकार
पुण्यातील आयटी व्यावसायिक समीर देशमुख यांनी शारीरिक मर्यादा आणि कठीण हवामानावर मात करत एव्हरेस्ट बेस कॅम्प ट्रेक पूर्ण केला आहे. 17,598 फूट उंचीवर -10 अंश सेल्सिअस तापमानात त्यांनी हा पराक्रम गाठला. सहा दिव्यांग ट्रेकर्सच्या टीमसोबत त्यांनी ही मोहीम यशस्वी केली. गंभीर अपघातानंतर पाय गमावूनही त्यांनी हार मानली नाही. त्यांच्या या कामगिरीमुळे जिद्द आणि इच्छाशक्तीचे उत्तम उदाहरण समोर आले आहे.
पुणे : औंध येथील आयटी व्यावसायिक समीर देशमुख यांनी 14 एप्रिल रोजी 17,598 फूट उंचीवरील एव्हरेस्ट बेस कॅम्प ट्रेक यशस्वीरित्या पूर्ण करत धैर्य आणि जिद्दीचा प्रेरणादायी आदर्श निर्माण केला आहे. -10°C पेक्षा कमी तापमान आणि कठीण भूप्रदेश यावर मात करत त्यांनी ही कामगिरी साध्य केली.
देशमुख हे सहा दिव्यांग ट्रेकर्सच्या गटाचा भाग होते, ज्यांनी गोव्यातील टिंकेश ऍबिलिटी फाऊंडेशनच्या सहकार्याने ही मोहीम पूर्ण केली. या मोहिमेला त्यांच्या आयुष्यात विशेष महत्त्व आहे, कारण ऑगस्ट 2024 मध्ये लडाखमधील भीषण अपघातात त्यांचा उजवा पाय गुडघ्याखाली कापावा लागला होता.
अपघाताची आठवण सांगताना देशमुख म्हणाले की, बाईक मोहिमेदरम्यान एका SUV ने धडक दिल्याने त्यांना गंभीर दुखापत झाली आणि ICU मध्ये उपचार घ्यावे लागले. मात्र, शुद्धीवर आल्यानंतरच त्यांनी एव्हरेस्ट बेस कॅम्प गाठण्याचे स्वप्न पुन्हा उराशी बाळगले.
“शक्ती शरीरात नसून इच्छाशक्तीत असते,” या विश्वासावर ठाम राहत त्यांनी कठोर परिश्रम केले. 8 एप्रिल रोजी नेपाळमधील लुक्ला येथून ट्रेकची सुरुवात करून सहा दिवसांत त्यांनी आपले ध्येय गाठले.
या प्रवासात हवामान आणि अपंगत्व ही मोठी आव्हाने होती. काही ठिकाणी स्वयंसेवकांच्या मदतीवर अवलंबून राहावे लागले, असे त्यांनी सांगितले. तरीही त्यांच्या कठोर तयारीने या यशात महत्त्वाची भूमिका बजावली.
गेल्या दोन महिन्यांत त्यांनी दररोज सहा किलो वजनासह चालण्याचा सराव, जिममधील व्यायाम आणि स्थानिक ट्रेक्स यावर भर दिला. तसेच दररोज 10 मजले चढणे आणि लिफ्टचा वापर टाळणे यासारख्या सवयी अंगीकारल्या.
देशमुख यांनी सांगितले की, योग, सकारात्मक विचारसरणी आणि आत्मविश्वास यामुळे त्यांना मानसिक अडथळ्यांवर मात करता आली. मोठ्या मोहिमांसाठी मानसिक ताकद अत्यंत महत्त्वाची असते, असेही त्यांनी नमूद केले.
