राजस्थान रॉयल्सचा युवा फलंदाज वैभव सूर्यवंशी सध्या आयपीएल 2026 मध्ये आपल्या तुफानी फलंदाजीमुळे चर्चेत आहे. गुजरात टायटन्सविरुद्धच्या सामन्यापूर्वी त्याने केलेला मदर्स डे पोस्ट सोशल मीडियावर मोठ्या प्रमाणात व्हायरल झाला. मैदानातही त्याने दमदार फलंदाजी करत आणखी एक मोठा विक्रम आपल्या नावावर केला. पुरुषांच्या टी-20 क्रिकेटमध्ये सर्वात वेगाने 100 षटकार पूर्ण करणारा तो सर्वात युवा खेळाडू ठरला आहे. राजस्थान रॉयल्सच्या ‘पिंक प्रॉमिस’ मोहिमेमुळेही हा सामना विशेष चर्चेत राहिला.
‘हे तुमच्यासाठी आहे, माँ’; वैभवचा पोस्ट चर्चेत
जयपूर : राजस्थान रॉयल्सचा 15 वर्षीय युवा खेळाडू वैभव सूर्यवंशी याने गुजरात टायटन्सविरुद्धच्या सामन्यापूर्वी सोशल मीडियावर एक भावनिक पोस्ट शेअर केली. “हे तुमच्यासाठी आहे, माँ,” असा संदेश त्याने इंस्टाग्रामवर पोस्ट केला होता. मदर्स डेच्या निमित्ताने केलेल्या या पोस्टला चाहत्यांकडून मोठा प्रतिसाद मिळाला आणि तो काही वेळातच व्हायरल झाला.
या सामन्यात राजस्थान रॉयल्सने त्यांच्या विशेष ‘पिंक प्रॉमिस’ मोहिमेअंतर्गत गुलाबी जर्सी परिधान केली होती. महिलांच्या सक्षमीकरणासाठी आणि ग्रामीण राजस्थानमधील सौरऊर्जा प्रकल्पांना मदत करण्यासाठी ही मोहीम राबवण्यात येत आहे.
15 व्या वर्षी टी-20 क्रिकेटमध्ये मोठा विक्रम
भावनिक वातावरणातही वैभव सूर्यवंशीने मैदानावर तुफानी फलंदाजी करत इतिहास रचला. पुरुषांच्या टी-20 क्रिकेटमध्ये 100 षटकार पूर्ण करणारा सर्वात वेगवान आणि सर्वात युवा खेळाडू बनण्याचा मान त्याने मिळवला. त्याने हा विक्रम केवळ 29 डाव आणि 514 चेंडूंमध्ये पूर्ण केला.
गुजरात टायटन्सविरुद्धच्या सामन्यात त्याने पहिल्याच चेंडूवर मोहम्मद सिराजला लाँग-ऑनवर शानदार षटकार ठोकत आपली आक्रमक शैली दाखवली. वैभवने 16 चेंडूत 36 धावांची खेळी केली. त्याच्या खेळीत तीन चौकार आणि तीन षटकारांचा समावेश होता.
या हंगामात वैभव सूर्यवंशी राजस्थानसाठी सर्वात प्रभावी फलंदाज ठरला आहे. त्याने 11 डावांत 40 च्या सरासरीने आणि 236.55 च्या स्ट्राइक रेटने 440 धावा केल्या आहेत. यामध्ये एक शतक आणि दोन अर्धशतकांचा समावेश आहे.
दरम्यान, राजस्थान रॉयल्सची ‘पिंक प्रॉमिस’ मोहीमही चर्चेचा विषय ठरली आहे. सामन्यात मारल्या जाणाऱ्या प्रत्येक षटकारामागे राजस्थानमधील सहा घरांना सौरऊर्जा उपलब्ध करून देण्याचा उपक्रम फ्रँचायझीकडून राबवण्यात येत आहे. फ्रँचायझीच्या माहितीनुसार, 2024 आणि 2025 मध्ये या मोहिमेमुळे 780 हून अधिक घरांना वीजपुरवठा करण्यात मदत झाली आहे.
विशेष म्हणजे, “औरत है तो भारत है” हे घोषवाक्य असलेली यंदाची गुलाबी जर्सी नाशिकमधील 19 वर्षीय समिक्षा रामेश्वर मुंदडा हिने डिझाइन केली आहे.
