ग्रामीण भागात इंधन उपलब्धतेसाठी प्रशासनाला तातडीच्या सूचना
शिर्डीत संरक्षण आणि एरोस्पेस संकुल उद्घाटनावेळी मुख्यमंत्र्यांचे विधान
महाराष्ट्रातील काही भागांमध्ये पेट्रोल आणि डिझेलच्या विक्रीत अचानक वाढ झाल्यानंतर राज्य सरकार सतर्क झाले आहे. मुख्यमंत्री देवेंद्र फडणवीस यांनी ग्रामीण भागातील शेतकऱ्यांना डिझेलचा अखंड पुरवठा सुनिश्चित करण्याचे आदेश प्रशासनाला दिले आहेत. इंधनाच्या काळाबाजाराला आळा घालण्यासाठीही कडक कारवाईचे संकेत देण्यात आले आहेत. शिर्डी दौऱ्यात मुख्यमंत्र्यांनी वंदे भारत रेल्वे प्रवासाचा अनुभवही शेअर केला. तसेच शिर्डी हे भक्तीबरोबरच शक्तीचे केंद्र म्हणून विकसित होत असल्याचे त्यांनी सांगितले.
शिर्डी : महाराष्ट्राचे मुख्यमंत्री देवेंद्र फडणवीस यांनी शनिवारी ग्रामीण भागातील इंधन टंचाई लक्षात घेऊन प्रशासनाला महत्त्वाच्या सूचना दिल्या. राज्यातील अनेक भागांत डिझेल आणि पेट्रोलची मागणी अचानक २० ते ३० टक्क्यांनी वाढल्याचे निदर्शनास आल्यानंतर सरकारने परिस्थितीवर बारकाईने लक्ष ठेवण्यास सुरुवात केली आहे.
शिर्डी येथे पत्रकारांशी संवाद साधताना मुख्यमंत्र्यांनी सांगितले की, काही भागांत शेतकऱ्यांच्या नावाखाली इंधनाचा काळाबाजार होत असल्याच्या तक्रारी समोर येत आहेत. त्यामुळे संबंधित अधिकाऱ्यांना कठोर कारवाईचे निर्देश देण्यात आले आहेत.
ते म्हणाले की, ग्रामीण भागात सध्या पेट्रोल आणि डिझेल उपलब्धतेबाबत अडचणी निर्माण झाल्या आहेत. या पार्श्वभूमीवर सर्व जिल्हाधिकारी आणि विभागीय आयुक्तांना आवश्यक त्या ठिकाणी शेतकऱ्यांना डिझेल उपलब्ध करून देण्याचे आदेश देण्यात आले आहेत.
पश्चिम आशियातील तणावपूर्ण परिस्थितीमुळे इंधन पुरवठ्यावर परिणाम होण्याची भीती व्यक्त केली जात आहे. या भीतीमुळे नागरिकांकडून मोठ्या प्रमाणात इंधन खरेदी होत असून, मे महिन्याच्या पहिल्या पंधरवड्यात महाराष्ट्रात पेट्रोल आणि डिझेल विक्रीत जवळपास २० टक्के वाढ झाल्याची माहिती समोर आली आहे.
दरम्यान, वंदे भारत एक्सप्रेसने शिर्डीपर्यंत प्रवास केलेल्या मुख्यमंत्री फडणवीस यांनी या सेवेला पंतप्रधान नरेंद्र मोदी यांची देशाला दिलेली विशेष भेट असे संबोधले. “हा अनुभव अतिशय चांगला होता. प्रवासादरम्यान मी अनेक फाइल्स क्लिअर केल्या आणि लोकांशी संवादही साधला,” असे ते म्हणाले.
शिर्डीतील संरक्षण आणि एरोस्पेस संकुलाच्या उद्घाटनावेळी बोलताना त्यांनी शिर्डी हे आता भक्ती आणि शक्तीचे प्रतीक बनत असल्याचे सांगितले. भारतीय अध्यात्मात भक्ती आणि सामर्थ्य यांचे नाते घट्ट असून, शक्तिशाली समाजच शांतता निर्माण करू शकतो, असेही त्यांनी नमूद केले.
