लातूरमधील RCC कोचिंग क्लासेसचे संचालक शिवराज मोटेगावकर यांच्याभोवतीचे वाद आता अधिक गडद होताना दिसत आहेत. नीट पेपरफुटी प्रकरणात सीबीआयने अटक केल्यानंतर त्यांच्या मालमत्ता आणि जमिनींच्या व्यवहारांवरही प्रश्न उपस्थित होत आहेत. हवेली सदस्यवारजे परिसरातील तब्बल ५१ गुंठे जागेच्या व्यवहारामुळे स्थानिकांमध्ये नाराजी निर्माण झाली आहे. सामाजिक संस्थेच्या नावावर असलेल्या या जागेवर कब्जा करण्याचा प्रयत्न झाल्याचा आरोप नागरिकांनी केला आहे. या प्रकरणात प्रशासनाकडून नोटिसा देण्यात आल्या असून संबंधित कागदपत्रांचीही तपासणी सुरू करण्यात आली आहे.
५१ गुंठे जागेवरून स्थानिकांचा आक्षेप
लातूर : आरसीसी कोचिंग क्लासेसचे संचालक शिवराज मोटेगावकर यांच्याशी संबंधित आणखी एक प्रकरण समोर आले आहे. हवेली सदस्यवारजे परिसरातील सुमारे ५१ गुंठे मोक्याच्या जागेवर दावा केल्याचा आरोप स्थानिकांनी केला आहे. ही जमीन सामाजिक संस्थेच्या नावावर असल्याचे सांगितले जात असून भविष्यात मोठ्या प्रकल्पासाठी या जागेचा वापर करण्याचा प्रयत्न सुरू असल्याची चर्चा आहे. परिसरातील नागरिकांनी या हालचालींना तीव्र विरोध दर्शवला असून हा प्रयत्न हाणून पाडल्याचा दावा स्थानिकांकडून करण्यात आला आहे.
राजर्षी शाहू महाराज बहुउद्देशीय सामाजिक विकास संस्था, महाराष्ट्र यांच्या नावावर या परिसरात दोन प्लॉट असल्याचे सांगितले जात आहे. या दोन्ही प्लॉटवर ताबा मिळवण्याचा प्रयत्न झाल्याचा आरोप करण्यात आला आहे. मात्र, नागरिकांनी एकत्र येत विरोध केल्यामुळे हा प्रकार रोखण्यात आल्याचे समोर आले आहे. या प्रकरणामुळे परिसरात मोठी चर्चा रंगली आहे.
सीबीआय कारवाईनंतर इतर व्यवहारांचीही चौकशी
नीट पेपरफुटी प्रकरणात सीबीआयने नुकतीच शिवराज मोटेगावकर यांना अटक केली आहे. त्यानंतर त्यांच्या इतर व्यवहारांचीही चौकशी सुरू झाली आहे. लातूरच्या खोगाव शिवारात उभारण्यात येत असलेल्या मेडिकल कॉलेज किंवा शैक्षणिक संकुलाच्या परवानग्यांवरूनही प्रश्न उपस्थित करण्यात येत आहेत. संबंधित बांधकामासाठी आवश्यक परवानग्या घेतल्या होत्या का, याची पडताळणी प्रशासनाकडून सुरू असल्याचे सांगितले जात आहे.
जिल्हा प्रशासनाने या प्रकरणात संबंधितांना नोटिसा बजावल्या असून आवश्यक कागदपत्रे सादर करण्याचे आदेश दिले आहेत. जमीन व्यवहार, परवानग्या आणि बांधकामाशी संबंधित सर्व बाबींची सध्या तपासणी सुरू आहे. या संपूर्ण प्रकरणामुळे लातूर जिल्ह्यात मोठी खळबळ उडाली आहे.
