दुचाकीला धडक बसून अपघात
मालवण | प्रतिनिधी : मालवण कसाल मुख्य रस्त्यावर सुकळवाड बाजारपेठ वरचानाका येथे पोलीसांच्या कार आणि दुचाकी यामध्ये झालेल्या भिषण अपघातात सुकळवाड भंडारवाडी येथील रहिवासी जगदीश तुकाराम मांजरेकर (४५) हा तरूण जागीर ठार झाला. ही घटना शुक्रवारी सायंकाळी ७ वाजण्याच्या सुमारास घडली.
मांजरेकर यांच्या ताब्यातील हिरो डुएट दुचाकी आणि पोलीसी कार बोलेरो (एमएच – ०७-एएस-०९६१) यांच्यात अपघात झाल्याचे दिसून येताच स्थानिकांनी घटनास्थळी धाव घेतली. जगदीश याला उपचारासाठी रूग्णवाहिकेतून जिल्हा रूग्णालयात हलविण्यात आले मात्र उपचारापुर्वीच डॉक्टरांनी तो मयत असल्याचे स्पष्ट केले. अपघात स्थळी मोठया संख्येने स्थानिक ग्रामस्थ उपस्थित होते. पोलीसांची गाडी मालवण येथून ओरोसच्या दिशेने जात असताना जगदीश हा कामावरून घरी जात असताना हा अपघात झाल्याचे बोलले जात होते.
पोलीसांच्याच गाडीची धडक बसून हा अपघात झाला. घटनास्थळी उपस्थित ग्रामस्थांनी याबाबत तीव्र संताप व्यक्त केला. जगदीश याच्या पश्चात आई, भाऊ असा परिवार आहे. जगदीश हा त्याच्या घरात एकुलता एक कमावता मुलगा होता. आई वयस्कर असून भाऊ आजारी असतो. त्यामुळे कुटुंबाला जगदीश आधार होता त्याच्या जाण्याने मांजरेकर कुटुंबीयांवर मोठा आघात झाला असून त्यांचा आधार हरपला आहे.सर्वत्र हळहळ व्यक्त होत आहे.
